කැප්පෙටිපොළ ඔහිය මාර්ගයේ ධාවනය වු මගී ප්‍රවාහන ලංගම බසයක් අනතුරට ලක්වීමෙන් එහි ගමන්ගත් 5 දෙනෙකු තුවාල ලබා රෝහල් ගත කර තිබෙනවා.
අනතුරින් තුවාල ලැබු මගීන් ඔහිය සහ දියතලාව රෝහල්වලට ඇතුලත් කර ඇති බවයි අප වාර්තාකරුවන් සඳහන් කළේ.
කැපිපෙට්පොළ සිට ඔහිය දක්වා මගීන් 5 දෙනෙකු සමග ධාවනය වු බසයේ තිරිංග හදිසියේ අක්‍රීයවීම හේතුවෙන් ඔහිය ප්‍රදේශයේදි සිදුවීමට ගිය අනතුරක් රියදුරාගේ දක්ෂතාවය වළක්වා ගෙන තිබෙනවා.
ඒ තිරිංග ක්‍රියා විරහිත වූ බසය පස් කණ්ඩියක ගැටීමට සැලැස්වීමෙන්.
අනතුරට ලක්වී තුවාල ලැබු මගීන්ගේ තත්වය බරපතල නොවන අතර සිද්ධිය සම්බන්ධයෙන් පොලිස් පරීක්ෂණ ක්‍රියාත්මකයි.
අනතුර සම්බන්ධයෙන් අදහස් දැක්වූ රියදුරු ඒ.ජී.එස් අසංක ප්‍රියමාල්..
මම අද දවල් සුපුරුදු පරිදි කැප්පෙටිපොළ සිට ඔහියට බසය ධාවනය කරගෙන ගියා. ඔහිය 9 කණුව අධික බෑවුමේ යද්දී බසයේ තිරිංග පද්ධතියම ගැලවුණා. මට කරගන්න දෙයක් නෑ .වම් පැත්තේ අධික බෑවුමක්. දකුණේ බෝක්කුවක්.. කරන්නම දෙයක් නෑ.. පල්ලමට ගියානම් තාමත් පෙරළෙනවා. ප්‍රපාතයේ අධික වේගයෙන් ධාවනය වු බසය තත්පර පහක් තුළදී මම පස් කණ්ඩියක හැප්පුවා.. ඒ වෙලාවේ රියදුරු අසුන යට දකුණු පැත්ත කඩාගෙන ඇතුලට ඇවිත් මගේ කකුල හිරවුණා.
ඒ වෙලාවේ බසයේ මගීන් හිටියේ පහයි. මගේ අත ඉරාගෙන ගියා. මගීන්ට තුවාල වුණා. එක් අයෙකුගේ දත් කැඩුණා. තවත් අයටත් තුවාල වුණා. මට බසය කණ්ඩියේ හප්පාගන්න බැරි වුණා නම් මගීන් සියලුම දෙනා කුඩු වෙලාම යනවා. ඒ තරමට අධික බෑවුමක්. මගේත් මගීන්ගේත් වෙලාව හොඳ නිසා අපි බේරුණා. මම බසය නවත්වාගත්ත විදිය මටත් හිතාගන්න බෑ. මගේ කකුලත් හොඳම තුවාල වෙලා මම දියතලාව රෝහලේ ප්‍රතිකාර ලබනවා. අනතුර වලක්වාගන්න මට පුළුවන් වීම ජීවිතයේ ලොකු සතුටක්.
