ගල්කිස්ස පොලිස් ස්ථානයට අනුයුක්තව සේවය කළ පොලිස් කොස්තාපල්වරයෙක් ටී-56 වර්ගයේ රාජකාරි ගිනි අවිය සහ උණ්ඩ 30ක් ද සමඟ අතුරුදන්ව ඇති බව පොලිසිය පවසනවා.
මෙම පොලිස් කොස්තාපල්වරයා සම්බන්ධයෙන් සිදුකළ සොයා බැලීමේ දී ඔහු ඊයේ (09) රාත්රියේ ඩුබායි රාජ්යය වෙත පිටව ගොස් ඇති බවයි අනාවරණය වී ඇත්තේ.
අදාළ පොලිස් නිලධාරියා මාර්ග බාධක රාජකාරි සඳහා වාර්තා කිරීම සඳහා ඊයේ (08) පස්වරු 5.30ට පමණ ගල්කිස්ස පොලිස් ස්ථානයට පැමිණ ටී-56 වර්ගයේ ගිනි අවියක් සහ උණ්ඩ 30ක් ලබාගෙන මාර්ග බාධක රාජකාරි සඳහා යන බව පවසා පොලිසියෙන් පිටව ගොස් තිබෙනවා.
කෙසේ වෙතත් මෙම නිලධාරියා මාර්ග බාධක රාජකාරී සඳහා අදාළ ස්ථානයට වාර්තා නොකර ඇති අතර, පසුව සිදුකළ සොයා බැලීමේ දී ඔහුගේ ජංගම දුරකථනය ද ක්රියා විරහිතකර තිබූ බවයි පොලිසිය සඳහන් කළේ.
ඉන් අනතුරුව සිදුකළ විමර්ශනවල දී මෙම පොලිස් නිලධාරියා ඊයේ (08) රාත්රී 10.15ට පමණ ගුවන් මඟින් ඩුබායි රාජ්යට පිටව ගොස් ඇති බවයි අනාවරණය වී ඇත්තේ.
මෙම පුද්ගලයා යළි දිවයිනට ගෙන්වා ගැනීමට ජාත්යන්තර පොලිසිය හරහා අවශ්ය කටයුතු සැලසුම්කර ඇති බවයි පොලිස් මාධ්ය ප්රකාශක ජ්යෙෂ්ඨ පොලිස් අධිකාරි කේ.බී.මනතුංග සඳහන් කළේ.
මේ අතර මෙම පොලිස් නිලධාරියා විසින් නීති විරෝධීව බැහැරකරන ලද ගිනි අවිය සහ උණ්ඩ සොයා පොලිස් කණ්ඩායම් 04ක් විමර්ශන අරඹා ඇති බවයි පොලිස් මාධ්ය ප්රකාශකවරයා වැඩිදුරටත් පැවසුවේ.
