අද පෙරවරුවේ වත්තල මංසන්දියේ රාජකාරියේ යෙදී සිටියදී මෝටර් රථයක ගැටීමෙන් රථවාහන පොලිසියේ නිලධාරියෙකු තුවාල ලබා තිබෙනවා.
පොලිස් නිලධාරියාගේ ප්‍රතිවිරුද්ධ දිශාවෙන් ධාවනය වෙමින් තිබු කාර් රථය, රාජකාරියේ යෙදී සිටි නිලධාරියාගේ සිරුරේ ගැටිමෙන් අනතුරුව එය නොනවත්වා ධාවනය වන අයුරු CCTV වීඩියෝවේ දැක්වෙනවා.
තුවාල ලැබූ නිලධාරියා වෙනත් පොලිස් නිලධාරීන්ගේ සහ එම ස්ථානයේ සිටි පුද්ගලයින්ගේ සහාය ඇතිව රෝහල් ගත කර තිබේ. අනතුරින් නිලධාරියාට සුළු තුවාල සිදුවී ඇති බව පොලිසිය වාර්තා කර සිටින්නේ.
වත්තල පොලිසිය විසින් මෝටර් රථයේ රියදුරු අත්අඩංගුවට ගෙන ඇති අතර වාහනයද භාරයට ගෙන තිබෙනවා.
මේ අතර, අද අලුයම 06 ට අවසන් වන ගතවූ පැය 24ක කාලය තුළ මාර්ග අනතුරු හේතුවෙන් මරණ 11 ක් වාර්තා වී තිබෙනවා.
පොලිස් මාධ්‍ය ප්‍රකාශක ජේෂ්ඨ නියෝජ්‍ය පොලිස්පති අජිත් රෝහණ පැවසුවේ ඊයේ (21) දිනයේදී ද රිය අනතුරු හේතුවෙන් මරණ 08ක් සිදුව ඇති බවයි.
දිනකට සිදුවන අනතුරු හේතුවෙන් මරණ 11ක් වන දෛනිකව වාර්තා වන පසුබිමක ඉදිරියේදී රිය අනතුරු නිසා මරණ වාර්තා වීමේ අගය ඉහළ යාමේ ප්‍රවණතාවයක් දක්නට ලැබෙන බවයි පොලිස් මාධ්‍ය ප්‍රකාශකවරයා වැඩිදුරටත් සඳහන් කර සිටියේ.
