විදේශ රටවල රැකියා සඳහා යවන බවට පවසමින් රුපියල් කෝටියක මුදලක් වංචා කළ සැකකරුවකු සහ සැකකාරියක් අද (03) දින අත්අඩංගුවට ගත් බව විදේශ සේවා නියුක්ති කාර්යාංශයේ විශේෂ වංචා විමර්ශන ඒකකය පවසනවා.
රුමේනියාවේ ඇපල් වතුවල සේවය සඳහා රැකියා ලබාදෙන බවට පවසා දිවයිනේ විවිධ ප්‍රදේශවල පුද්ගලයින් සිව් දෙනෙකුගෙන් රුපියල් ලක්ෂ දහයක් වංචා කළ බව කියන සිද්ධියක් මත සිදුකළ විමර්ශනයේදී එම සැකකරු අත්අඩංගුවට ගෙන තිබෙනවා.
මෙලෙස අත්අඩංගුවට ගෙන ඇත්තේ කෝට්ටේ මාදිවෙල රාහුල පුර ප්‍රදේශයේ පදිංචිකරුවෙක්.
මුදල් වංචාවට හසුවූ පුද්ගලයන් සිව් දෙදෙනකු විසින් සිදුකළ පැමිණිලි මත මෙම සැකකරු අත්අඩංගුවට ගෙන තිබෙනවා.
කැනඩා රාජ්‍යයේ සුප්‍රසිද්ධ බීම වර්ග නිෂ්පාදනය කරන ආයතනයක රැකියා ලබා දෙන බවට පවසමින් රුපියල් ලක්ෂ අනූවක මුදලක් වංචා කළ අනෙක් සැකකාරිය යාපනය ප්‍රදේශයේදී අත්අඩංගුවට ගත් බවද එම ඒකකය පවසනවා.
එලෙස එක් රැකියාවක් සඳහා රුපියල් ලක්ෂ තිහ බැගින් වූ මුදලක් තමන්ගෙන් ලබා ගෙන සැකකාරිය විසින් වංචා කළ බවට පුද්ගලයන් තිදෙනකු විසින් සිදුකළ පැමිණිල්ල මත සිදුකළ විමර්ශනයකින් අනතුරුව එම 53 හැවිරිදි සැකකාරිය අත්අඩංගුවට ගෙන තිබෙනවා.
අත්අඩංගුවට ගත් සැකකරු සහ සැකකාරිය මහේස්ත්‍රාත් අධිකරණ වෙත ඉදිරිපත් කිරීමට නියමිතයි.
විදේශ සේවා නියුක්ති කාර්යාංශයේ නියෝජ්‍ය සාමාන්‍යාධිකාරී (නීති) නෙළුම් සමරනායක මහත්මියගේ උපදෙස් පරිදි විශේෂ විමර්ශන ඒකකයේ නිලධාරීන් විසින් මෙම සැකකරුවන් අත්අඩංගුවට ගැනීමට කටයුතු කර තිබුණා.
