බස්නාහිර පළාතද ඇතුළුව සියලුම පාසල්වල පළමු වාරයේ දෙවැනි අදියර අද (15 වැනිදා) ආරම්භ කෙරේ.
බස්නාහිර පළාතේ පාසල්වල අද (15 වැනිදා) ආරම්භ කෙරෙන්නේ පහ, එකොළහ සහ දහතුන යන ශ්‍රේණි පමණි. පළමු ශ්‍රේණියද ඇතුළුව සෙසු සියලුම ශ්‍රේණි අප්‍රේල් මස 19 වැනිදා ආරම්භ කෙරෙන බව අධ්‍යාපන අමාත්‍යාංශය පවසයි.
එළැඹෙන අගෝස්තු මස පැවැත්වීමට නියමිත උසස් පෙළ හා ශිෂ්‍යත්ව යන විභාග කල් දැමීම සඳහා මෙතෙක් කිසිදු තීරණයක් ගෙන නැතැයිද අධ්‍යාපන අමාත්‍යාංශ ලේකම් මහාචාර්ය කපිල පෙරේරා ‘අරුණ’ ට ඊයේ (14 වැනිදා) පැවැසීය.
කෙසේ වුවද එම සිසුන්ගේ විෂය නිර්දේශ ආවරණය කර තිබේද යන්න සම්බන්ධයෙන් අධ්‍යයනය කරන බවත් විෂය නිර්දේශ ආවරණය වී නොමැති නම් පමණක් විභාග කල්දැමීම පිළිබඳ අවධානය යොමු කිරීමට සිදුවන බවත් ලේකම්වරයා සඳහන් කළේය.
විභාග කොමසාරිස් ජනරාල් සනත් පූජිත ද ප්‍රකාශ කළේ විෂය නිර්දේශ ආවරණ කටයුතු සම්බන්ධයෙන් අධ්‍යාපන අමාත්‍යාංශය අධ්‍යයනය කරමින් සිටින බවය.
නිලන්ත මදුරාවල
