යාපනය දිස්ත්‍රික්කයේ පසුගිය වසර අග භාගයේ ශීඝ්‍රයෙන් පැතිර ගිය ලෙප්ටස්පයිරා හෙවත් මී උණ රෝගය වැළඳී සිටි තවත් පුද්ගලයින් දෙදෙනකු පෙරේදා (02) දින ජීවිතක්ෂයට පත් වූ බව යාපනය දිස්ත්‍රික් ප්‍රාදේශීය සෞඛ්‍ය සේවා අධ්‍යක්ෂ වෛද්‍ය කලනිති මහත්මිය පවසනවා.
අද (04) පැවති මාධ්‍ය හමුවක දී එම අධ්‍යක්ෂවරිය පැවසුවේ මෙම මරණ දෙකම මී උණ ආසාදිතව සිදු වූ බවට තහවුරු වී ඇති බවයි.
දෙසැම්බර් මාසයේ දෙවැනි සතිය වන විට හඳුනා නොගත් වෛරසයක් හේතුවෙන් රෝගීන් සත් දෙනෙකු මියගිය බවට යාපනය රෝහල් ආරංචි මාර්ග ප්‍රකාශ කළා.
පසුව එම රෝග ලක්ෂණ ම පෙන්නුම් කළ රෝගීන් විශාල වශයෙන් යාපනය රෝහලට ඇතුළත් කිරීමත් සමග කොළඹ වසංගත රෝග විද්‍යා අංශයේ සෞඛ්‍ය නිලධාරීන් යාපනයට ගියේ එම රෝගී තත්ත්වය කුමක්දැයි පරීක්ෂා කිරීමටයි.
පසුව රෝගීන්ගේ සාම්පල රැගෙන පරීක්ෂා කළ විට හෙළි වූයේ එම රෝගීන්ගේ රුධිර සාම්පලවල මී උණ බැක්ටීරියාව අඩංගුව වන ඇති බවටයි.
කෙසේවෙතත් පසුව වෛද්‍ය අංශ මෙම මී උණ රෝගය පැතිරීම පාලනය කිරීමට පියවර ගත් බව ප්‍රකාශ කළා.
එලෙස පාලනය කළ පසුබිමකදියි නැවතත් මී උණ ආසාදිතව සිදු වූ තවත් මරණ දෙකක් වාර්තා වී ඇත්තේ.
ඒ අනුව මී උණ වැළඳීමෙන් යාපනය තුළ මියගිය ගණන 09ක් දක්වා ඉහළ යනවා.
