ජාතික ජන බලවේගය පක්ෂයේ සාමාජිකත්වය ලබාගත් එකම පවුලේ පිරිසකට ලංකා කම්කරු කොංග්‍රසයේ ආධාරකරුවෙකුගෙන් ප්‍රහාරයක් එල්ල වී තිබෙනවා.
ජාතික ජන බලවේගයට අනුබද්ධ සමස්ත ලංකා වතු කම්කරු සංගමයේ සාමාජිකත්වය ලබාගත් එකම පවුලේ තිදෙනෙකුට ලංකා කම්කරු කොංග්‍රසයේ ආධාරකරුවෙකු පහර දුන්නේ යැයි කියන සිද්ධියක් සම්බන්ධයෙන් ලද පැමිණිල්ලක් මත එම ආධාරකරුවා ඊයේ (22) දින අත්අඩංගුවට ගත් බව නොර්වුඩ් පොලිසියේ ස්ථානාධිපති පොලිස් පරික්ෂක රාජනායක පැවසුවා.
නොර්වුඩ් පොලිස් වසමට අයත් නිව්ටන් වතුයායේ පදිංචි ලංකා කම්කරු කොංග්‍රසයේ හිටපු ආධාරකරුවෙකු ඔහුගේ බිරිඳ සහ 12 හැවිරිදි පිරිමි දරුවාට සැකකරු විසින් පහර දී තුවාල සිදු කර ඇති බවයි ස්ථානාධිපතිවරයා කියා සිටියේ.
පහරකෑමෙන් තුවාල ලැබු තිදෙනා දික්ඔය මුලික රෝහලේ නේවාසිකව ප්‍රතිකාර ලබනවා.
2025 වසර වෙනුවෙන් වතු වෘත්තීය සමිතිවලට සාමාජිකයින් බඳවා ගැනීමේ දී ලංකා කම්කරු කොංග්‍රසයේ මෙතෙක් සාමාජිකත්වය දැරූ විශාල පිරිසක් සමස්ත ලංකා වතු කම්කරු සංගමයේ සාමාජිකත්වය ලබාගෙන ඇති බවත්, පහරකෑමෙන් තුවාල ලැබූ පිරිමි පුද්ගලයා සහ කාන්තාව ද එම සාමාජික්තවය ලබා ගැනීම නිසා සැකකරු උරණ වී මෙම පහරදීම සිදු කර ඇති බවයි ජාතික ජන බලවේගය සමස්ත ලංකා වතු කම්කරු සංගමයේ උපලේකම් සහ නුවරඑළිය දිස්ත්‍රික් පා.මන්ත්‍රී ක්‍රිෂ්ණන් කලෙයිචෙල්වි මෙනෙවිය පැවසුවේ.
එම වතුයායේ වතු වෘත්තීය සමිති සාමාජිකයින් 40 දෙනෙකුගෙන් 27 දෙනෙකු තම වෘත්තීය සමිති සාමාජිකත්වය ලබාගෙන ඇති බවත්, සමස්ත වතුකරයේ ම වතු වෘත්තීය සමිතිවල මෙතෙක් සාමාජිකත්වය දැරූ 75% ක පමණ වතු කම්කරුවන් පිරිසක් තම වෘත්තීය සමිතියේ සාමාජිකත්වය දැරීම නිසා අනෙකුත් වෘත්තීය සමිතිවල සාමාජිකයින්ගෙන් තම වෘත්තීය සමිතියට එක් වූ සාමාජිකයින්ට විවිධ අයුරින් බලපෑම් සහ
තර්ජන සිදු කරන බවත් වාර්තා වනවා.
අත්අඩංගුවට ගත් සැකකරු හැටන් මහෙස්ත්‍රාත් අධිකරණය වෙත ඉදිරිපත් කිරීමට නියමිතයි.
