ශ්‍රී ලංකාවට තීරණාත්මක තරගයක් වූ දෙවන විස්සයි විස්ස තරගය ඉන්දියාව පරදා ලකුණු 16ක සුපිරි ජයක් වාර්තා කිරීමට ශ්‍රී ලංකා කණ්ඩායමට ඊයේ (06) රාත්‍රියේ හැකියාව ලැබුණා.
කුසල් මෙන්ඩිස්, චරිත් අසලංක, පන්තුම් නිස්සංක පිත්තෙන් දැක්වූ දක්ෂතා සහ නායක දසුන් ශානකගේ අති විශිෂ්ඨ තුන් ඉරියව් දක්ෂතා මෙන්ම කසුන් රාජිත සහ දිල්ෂාන් මධුසංකගේ සුපිරි පන්දු යැවීම ශ්‍රී ලංකා කණඩායමේ මෙම ජයග්‍රහණය සඳහා ප්‍රධාන වශයෙන් දායක වූ බව නොරහසක්.
ශ්‍රී ලංකාව ලැබූ මෙම ජයග්‍රහණයත් සමඟ තරග තුනකින් සමන්විත විස්සයි විස්ස තරගාවලිය තවත් තියුණු මුහුණුවරක් ගනු ලැබුවේ කණ්ඩායම් දෙකම මේ වනවිට එක් තරගය බැඟින් ජයගෙන සිටීම හේතුවෙන්.
පිත්තෙන් සහ අවශ්‍යම මොහොතේ පන්දුවෙන් දස්කම් දැක්වීමට සමත් වූ දසුන් ශානක ඊයේ තරගයේ වීරයා බවට පත් වුණා.
මෙහිදී දසුන්ගේ මෙම සුපිරි දක්ෂතා සහ ශ්‍රී ලංකා කණ්ඩායමේ ජයග්‍රහණය වෙනුවෙන් සුබ පැතුම් එක්කරන්නට හිටපු ක්‍රීඩක තරු සිය සමාජ මාධ්‍ය ගිණුම් ඔස්සේ කටයුතු කර තිබුණා.
මෙහිදී ශ්‍රී ලංකා හිටපු සුපිරි වේග පන්දු යවන ක්‍රීඩක ලසිත් මාලිංග සිය නිල ට්විටර් ගිණුමට සටහනක් එක්කරමින් පවසා තිබුණේ දසුන්ගේ මෑතකාලීන රංගනයෙන් අයි.පි.එල්. කොන්ත්‍රාත්තුවක් ගැන කෑගසන බවයි.
ඔහු ඉක්මනින් අයි.පි.එල්. ගිවිසුමකට නොපැමිණියහොත් තමන් පුදුමයට පත්වන බවයි මාලිංග එහි වැඩිදුරටත් සඳහන් කරමින් අනාවැකි පළකර තිබුණේ.
