ඊයේ (12) දිනයේ සිදු වූ රිය අනතුරු දෙකකින් දෙදෙනකුට දිවි අහිමි වුණා.
ඉන් එක් මරණයක් වාර්තා වන්නේ පිංදෙනිය පොලිස් වසමේ හරිගල – මල්වාන මාර්ගයේ කිරිදන ප්‍රදේශයේ දී යි.
මල්වාන දෙස සිට හරිගල දෙසට ධාවනය වූ ත්‍රීරෝද රථයක් රියදුරුට පාලනය කර ගැනීමට නොහැකිව ප්‍රපාතයකට පෙරළී අනතුරක් සිදු වුණා.
එම අනතුරින් බරපතළ තුවාල ලැබූ ත්‍රීරෝද රථ රියදුරු හා එහි ගමන් ගත් පුද්ගලයෙකු තොරණගහපිටිය රෝහලට ඇතුළත් කිරීමේ දී රියදුරු මියගොස් ඇති බවයි පොලිස් මාධ්‍ය ප්‍රකාශක කාර්‍යාලය පැවසුවේ.
අනෙක් තුවාලකරුවන් වැඩිදුර ප්‍රතිකාර සඳහා කෑගල්ල රෝහලට මාරු කර යැවුණා.
මරණකරු වයස අවුරුදු 56 ක් වූ කිරිදන, අටාල ප්‍රදේශයේ පදිංචිකරුවෙක්.
මේ අතර තවත් මාරක අනතුරක් ඊයේ උදෑසන කාලයේ ඇල්ල පොලිස් වසමේ හාලිඇල – බෙරගල මාර්ගයේ හල්පේ ප්‍රදේශයේ දී සිදු වුණා.
බදුල්ල දෙස සිට බණ්ඩාරවෙල දෙසට ධාවනය වූ ලොරි රථයක් මාර්ගයේ වම්පස නවත්වා තිබී නැවත මාර්ගයට ගැනීමේදී බදුල්ල දෙස සිට බණ්ඩාරවෙල දෙසට ගමන් කළ යතුරුපැදියක ගැටී අනතුරක් සිදුව වූ අතර ඉන් බරපතළ තුවාල ලැබූ යතුරුපැදිකරු දෙමෝදර රෝහලට ඇතුළත් කිරීමේ දී මරුමුවට පත් වුණා.
මරණකරු වයස අවුරුදු 43 ක් වූ ගල්බොක්ක, වැල්ලවාය ප්‍රදේශයේ පදිංචිකරුවෙක්.
අනතුරට සම්බන්ධ ලොරි රථයේ රියදුරු අත්අඩංගුවට ගෙන තිබෙනවා.
ඇල්ල පොලිසිය වැඩිදුර විමර්ශන සිදු කරනු ඇති.
