හිටපු ජනාධිපති මහින්ද රාජපක්ෂ මහතාගේ නිල නිවසෙහි (විජේරාම පිහිටි) පසුපස පර්යන්තයේ ඉදිකර ඇති ආරක්ෂකයින් රැඳී සිටින නිවස්නයෙහි ජල කප්පාදුවක් සිදු කර තිබෙනවා.
අදාළ සිදුවීම සම්බන්ධයෙන් දසත ප්‍රවෘත්ති අංශය හිටපු ජනාධිපති මහින්ද රාජපක්ෂ මහතාගේ මාධ්‍ය ප්‍රකාශක නීතිඥ මනෝජ් ගමගේ මහතාගෙන් කළ විමසීමක දී ඔහු එම කාරණාව සනාථ කළා.
ඊට හේතු වශයෙන් මාධ්‍ය ප්‍රකාශකවරයා පැවසුවේ; රජයෙන් ජනාධිපතිවරයෙකුට ලබා දී ඇති ආරක්ෂකයින්ගේ පහසුකම් සැලසීම ද රජය මගින් මෙතෙක් කල් සිදු කරගෙන ගිය බවත්; ඒ අනුව එම ආරක්ෂක නිවස්නයේ ජල බිල්පත ගෙවීමේ වගකීම ඇත්තේ මහින්ද රාජපක්ෂ මහතාට නොවන බවත් ජනාධිපති ලේකම් කාර්‍යාලයට බවයි.
මේ වනවිට බිල්පතෙහි ගාස්තුව රුපියල් ලක්ෂ 03ක් පමණ වන බව ද හෙතෙම පැවසුවා.
පසුගිය කාලය පුරා ම වත්මන් රජය විසින් හිටපු ජනාධිපතිවරයා ව නුගේගොඩ – විජේරාම පිහිටි නිල නිවසෙන් ඉවත් කිරීමට සැලසුම් සකස් කරමින් සිටින බවත් මෙය ද එහි කොටසක් බව ද මාධ්‍ය ප්‍රකාශක ගමගේ මහතා කියා සිටියා.
රුපියල් ලක්ෂ 03ක පමණ බිල්පත මාස කිහිපයකට පමණ ඒවා බවත්, එවකට ආරක්ෂකයින් රජයෙන් සැපයූ පරිදි 160 දෙනෙකු සේවය කළ බවත් එවැනි මුදලක් පැමිණීම සාධාරණ බවයි.
මේ වනවිට වත්මන් රජයෙන් එම ආරක්ෂකයින් ගණන 60ක් දක්වා අඩු කර තිබෙනවා.
කෙසේ නමුත් හිටපු ජනාධිපති මහින්ද රාජපක්ෂ රැඳී සිටින කොටසේ ජල සැපයුම විසන්ධි කර නොමැති බව ද වාර්තා වනවා.
