මහරගම දී අරගලකරුවන් සමඟ එක් වූ පොලිස් නිලධාරියා අත්අඩංගුවට

පසුගිය 09 වනදා මහරගම නගරයේ දී අරගලයට සහාය දක්වමින් අරගලකරුවන් සමඟ එක් වූ පොලිස් සැරයන්වරයා අත්අඩංගුවට ගෙන තිබෙනවා.

අද (11) අළුයම නිල ඇඳුමෙන් සැරසී තියුණු ආයුධයක් රැගෙන ජනාධිපති මන්දිරයට ඇතුළු වීමට තැත් කිරීමේදී ඔහු අත්අඩංගුවට ගෙන ඇතැයි පොලිස් මාධ්‍ය ප්‍රකාශක ජ්‍යෙෂ්ඨ පොලිස් අධිකාරී නීතීඥ නිහාල් තල්දූව සඳහන් කළා.

මෙලෙස අත්අඩංගුවට ගෙන ඇත්තේ නාරාහේන්පිට පිහිටි පොලිස් ගරාජයේ සේවයේ නියුතු සැරයන්වරයෙක් බවයි වාර්තා වුණේ.

ඔහු හෝමාගම, මාගම්මන ප්‍රදේශයේ පදිංචිකරුවෙක්.

සැකකාර සැරයන්වරයා සන්තකයේ තිබී මන්න පිහියක් ද පොලිස් භාරයට ගෙන තිබෙනවා.

අත්අඩංගුවට ගත් පොලිස් සැරයන්වරයා ඉකුත් 09 වනදා අරගලයට පාගමනින් යමින් සිටි තරුණ පිරිසකට මහරගම නගරයේ දී තම දෙඅත් උස්සා සහාය පළකරමින් ඔවුන් සමඟ එකවන ආකාරය දැක්වෙන වීඩියෝවක් ද සමාජ මාධ්‍යවල සංසරණය වුණා.