මවගේ වරදින් කොත්මලේ ජලාශයේ සැඟවී ගිය දරුවාගේ සිරුර හමුවෙයි

සිය දරුවා ද සමඟ සියදිවි හානිකර ගැනීම අරමුණින් ඉහළ කොත්මලේ ජලාශය පැන්න කාන්තාවක් බේරාගැනීමට ප්‍රදේශවාසීන්ට ඊයේ (16) හැකියාව ලැබුණා.

එහිදී දියේ ගිලී අතුරුන්දව සිටි දරුවාගේ සිරුර අද (17) පෙරවරුවේ සොයාගත් බවයි අප වාර්තාකරු සඳහන් කළේ.

තලවකැලේ පොලිසිය සහ ඉහළ කොත්මලේ ජලාශයේ ආරක්ෂක අංශ නිලධාරින් එක්ව සිදුකළ මෙහෙයුමක දී මෙම සිව් හැවිරිදි දරුවාගේ සිරුර සොයාගෙන තිබෙනවා.

තලවකැලේ දෙව්සිරිපුර ප්‍රදේශයේ පදිංචි 41 හැවිරිදි කාන්තාවක් සිය සැමියාගෙන් වෙන් වී පුඩළුඔය ප්‍රදේශයේ පුද්ගලයෙකු සමඟ වාසය කර තිබෙනවා.

පසුව එම අනියම් සැමියා වෙනත් විවාහයක් සිදුකර ගැනිම සම්බන්ධයෙන් සිත් තැවුලට පත් මෙම කාන්තාව ඊයේ (16) පස්වරුවේ ජලාශයට පැන ඇති බවයි වාර්තා වුණේ.

තලවකැලේ දුම්රිය පාලම මතින් මෙම කාන්තාව සිය දරුවා ද සමඟ ජලාශයට පැන ඇති බවයි අනවරණය වුණේ.

පසුව ප්‍රදේශවාසීන්ට ජලාශයේ ගිලෙමින් සිටි කාන්තාව බේරාගැනීමට සමත් වූ අතර, එම අවස්ථාවේ දී දරුවා දියේ ගිලී අතුරුදන්ව තිබෙනවා.

බේරාගත් කාන්තාව ලිඳුල ප්‍රාදේශිය රෝහල වෙත ඇතුළත් කිරීමෙන් පසු වැඩිදුර ප්‍රතිකාර සඳහා නුවරඑළිය දිස්ත්‍රික් මහ රෝහල වෙත මාරුකර යවා ඇති බවයි වාර්තා වුණේ.

මේ අතර අද (17) දිනයේ සොයාගත් අතුරුදන්ව සිටි දරුවාගේ මෘත ශරීරය පශ්චාත් මරණ පරික්ෂණය සඳහා නුවරඑළිය දිස්ත්‍රික් මහ රෝහලේ අධිකරණ වෛද්‍යවරයා වෙත යොමු කරන බවයි තලවකැලේ පොලිසිය සඳහන් කළේ.

අනියම් සැමියා සහ මියගිය කාන්තාව අතර, පවුල් ආරවුලක් සම්බන්ධයෙන් තලවකැලේ සහ පුඩළුඔය පොලිසියේ පැමිණිලි කිහිපයක් ද විභාග කර ඇති බවට ද තොරතුරු අනාවරණය වී තිබෙනවා.