මාතර බන්ධනාගාරයේ රැඳවූවන් රඳවා සිටි සිර මැදිරියකට (01) රාත්‍රී කාලයේ දී බෝ ගසක අත්තක් කඩා වැටීමෙන් සිදු වූ අනතුරින් දැඩි සත්කාර ඒකකයේ ප්‍රතිකාර ලබමින් සිටි තවත් රැඳවූවෙකු ජීවිතක්ෂයට පත් ව තිබෙනවා.
අද (03) පෙරවරුවේ එම රැඳවූවා ද මියගිය බවයි මාතර රෝහල් ආරංචි මාර්ග පවසන්නේ.
මෙම අනතුර පෙරේදා රාත්‍රී 10.30ට පමණ සිදු වූ අතර ඉන් එක් රැඳවියෙකු ද ඊයේ මියගියා.
ඒ ඔහු ද දැඩි සත්කාර ඒකකයේ ප්‍රතිකාර ලබමින් සිටි පසුබිමකයි.
ඒ අනුව මෙම හදිසි අනතුරින් මියගිය සංඛ්‍යාව දෙදෙනකු දක්වා ඉහළ ගොස් තිබෙනවා.
මෙම අනතුරින් තවත් රැඳවූවන් 12 දෙනෙකු තුවාල ලැබූ අතර මේ වනවිටත් ඔවුන් මාතර මහ රෝහලේ පූර්ණ ආරක්ෂාව යටතේ ප්‍රතිකාර ලබනවා.
කෙසේවෙතත් බෝ ගසේ අත්ත කඩා වැටීම හේතුවෙන් සිර මැදිරි වාට්ටු දෙකකට හානි සිදුවීම හේතුවෙන් එම පරිශ්‍රයේ සිටි සෙසු රැඳවූවන් මේ වනවිට අඟුණුකොළපැලැස්ස එළිමහන් බන්ධනාගාරයට මාරු කර යැවීමටයි කටයුතු කර ඇත්තේ.
ඊයේ මෙම සිදුවීමෙන් පසුව ඇතැම් රැඳවූවන් සිර මැදිරියෙන් සූක්ෂ්මව පැන යාමට උත්සාහ කළ බවටත් වාර්තා වනවා.
කෙසේවෙතත් මේ වනවිට බන්ධනාගාරයේ අවට පොලිස් විශේෂ කාර්‍යය බලකාය සහ පොලිසිය යොදවා දැඩි ආරක්ෂාවක් තර කර ඇති බවයි වාර්තා වන්නේ.
මේ වනවිට තුවාල ලැබූ 7 දෙනෙකු යළි බන්ධනාගාරය වෙත රැගෙනවිත් ඇති අතර, තවත් තිදෙනෙකු සාමාන්‍ය වාට්ටුවල ප්‍රතිකාර ලබමින් සිටිනවා.
