2022 දෙසැම්බර් 18 වැනිදා හංවැල්ල ප්රදේශයේ පිහිටි වෙළෙඳසැලකට ඇතුළු වී එහි හිමිකරු වන මොහොම්මදු පාර්සාන් ලෙබ්බේ නමැත්තා වෙඩි තබා ඝාතනය කිරීමේ චෝදනාව යටතේ කොළඹ මහ අධිකරණයේ විභාග වන නඩුව කැඳවු අවස්ථාවේ දී එහි විත්තිකරුවකු වන ”බූරුමූණා” නොහොත් රවිඳු සංඛ සිල්වා නමැත්තා බූස්ස බන්ධනාගාරයෙන් අධිකරණයට ඉදිරිපත් කිරිමට ප්රමාද වීම සම්බන්ධයෙන් ඊළඟ නඩු දිනයේ දී අධිකරණය හමුවේ පෙනී සිට ප්රමාදයට හේතු කරුණු දක්වන ලෙස බූස්ස බන්ධනාගාර අධිකාරිවරයාට කොළඹ මහාධිකරණ විනිසුරු සුජීව නිශ්ශංක මහතා නියෝග කර තිබෙනවා.
නඩුකරය පෙරවරු 9.45 ට ආරම්භ වුවත් 10.30 වන තුරු විත්තිකරු අධිකරණය ඉදිරිපත් කෙරුණේ නැති හෙයින් ඒ සම්බන්ධයෙන් පැමිණ කොළඹ බන්ධනාගාර අධිකාරිවරයාට කරුණු දක්වන ලෙස ද විනිසුරුවරයා නියෝග කළා.
ඒ අනුව පැය දෙකක් ඇතුළත කොළඹ බන්ධනාගාර අධිකාරිවරයා අධිකරණය හමුවේ පෙනී සිටි අතර නඩුව නැවත කැඳවනු ලැබුවා.
එහිදි කරුණු විමසු මහාධිකරණ විනිසුරුවරයා බූස්ස බන්ධනාගාර අධිකාරිවරයාට නියෝග කළේ සැප්තැම්බර් 24 දින අධිකරණයට හමුවේ පෙනී සිට ප්රමාදයට හේතු දක්වන ලෙසයි.
මෙම නඩුවේ විත්තිකරුවන් ලෙස සම්පත් නිරෝෂන්, ඩුබායි රාජ්යයේ සැඟව සිටින ලලිත් කන්නන්ගර සහ බූරුමූණා නොහොත් රවිඳු සංඛ ද සිල්වා නම්කර තිබෙනවා.
