යාපනය කන්නාඩි කාලි කෝවිලේ වාර්ෂික දේව මංගල්‍යයට පැමිණ සිටි බැතිමතුන්ගේ රන් භාණ්ඩ සහ මුදල් සොරාගත් කාන්තාවක් පොලිස් අත්අඩංගුවට ගෙන තිබෙනවා.
අප ප්‍රාදේශීය වාර්තාකරු පැවසුවේ, මෙම සිදුවීම ඊයේ (09) දිනයේ දී සිදු ව ඇති බවයි.
අදාළ සැකකාරිය අත්අඩංගුවට ගෙන ඇත්තේ පොලිසියට ලද පැමිණිල්ලක ප්‍රතිඵලයක් මත බවත් වාර්තා වනවා.
මෙලෙස අත්අඩංගුවට ගෙන ඇත්තේ වව්නියාව – පූන්තෝට්ටම් ප්‍රදේශයේ පදිංචි 27 හැවිරිදි කාන්තාවක්.
පොලිසිය සිදු කරන ලද විමර්ශනවල දී සැකකාරිය විසින් සොරාගනු ලැබූ රන් තැල්ලක්, මාලයක්, අත් පළඳනාවක් ඇතුළු රන් භාණ්ඩ කිහිපයක් පොලිස් භාරයට ගෙන තිබෙනවා.
මේ දිනවල උතුරු පළාතේ කෝවිල්වල වාර්ෂික දේව මංගල්‍යයන් පැවැත්වෙන අතර, ඇතැම් පිරිස් කල්ලි වශයෙන් සංවිධානාත්මක ව පැමිණ මෙලෙස රන් භාණ්ඩ සොරා ගන්නා බවයි පොලිස් විමර්ශනවල දී හෙළි ව ඇත්තේ.
අත්අඩංගුවට ගත් සැකකාරිය යාපනය මහේස්ත්‍රාත් අධිකරණයට ඉදිරිපත් කිරීමට නියමිතයි.
