බාල සහෝදරයාගේ ඝාතනයට ඇල්ලූ වැඩිමල් සහෝදරයා සහ බිරිඳ රිමාන්ඩ්

අම්බලන්තොට, මාමඬල ප්‍රදේශයේ දී විදුලි රැහැන් ඇද බාල සහෝදරයා ඝාතනය කිරීම සම්බන්ධයෙන් අත්අඩංගුවට ගත් සැකකාර වැඩිමල් සහෝදරයා සහ ඔහුගේ බිරිඳ ලබන බස 09 වනදා දක්වා රක්ෂිත බන්ධනාගාර ගතකර තිබෙනවා.

ඒ, ඔවුන් දෙදෙනා ඊයේ (26) හම්බන්තොට මහේස්ත්‍රාත් අධිකරණය වෙත ඉදිරිපත් කිරීමෙන් අනතුරුවයි.

පසුගිය 25 වනදා අලුයම් කාලයේ දී සිය වැඩිමල් සහෝදරයාගේ නිවසේ නවතා තිබූ ත්‍රිරෝද රථයේ බැටරිය සොරකම් කිරීමට පැමිණි බාල සහෝදරයා අනවසර විදුලි රැහැනක පැටලී එම ස්ථානයේ ඇද වැටී තිබෙනවා.

එම අවස්ථාවේ දී වැඩිමල් සහෝදරයා පැමිණ බිම වැටී සිටි බාල සහෝදරයාට යකඩ බටයකින් පහර දී අත් පා ගැටගසා ඇති බවයි පොලිසිය සඳහන් කළේ.

පසුව සිද්ධිය සම්බන්ධයෙන් ලද තොරතුරක් මත පොලිසිය පැමිණ සිදුකළ පරීකෂා කිරීමේ දී අදාළ පුද්ගලයා මියගොස් සිට ඇති බවයි වාර්තා වුණේ.

මෙලෙස මියගොස් ඇත්තේ වයස අවුරුදු 35ක අම්බලන්තොට, මාමඬල ප්‍රදේශයේ පදිංචි අයෙක්.

ඒ, අනුව බාල සහෝදරයාගේ ඝතනය සම්බන්ධයෙන් වැඩිමල් සහෝදරයා සහ ඔහුගේ බිරිඳ පොලිස් අත්අඩංගුවට ගැනීමටයි කටයුතු කර ඇත්තේ.

ඔවුන් දෙදෙනා වයස අවුරුදු 49 සහ 44 යන වයස්වල පසුවන්නන් බවයි පොලිසිය වැඩිදුරටත් සඳහන් කළේ.

ඝාතනයට ලක්වූ පුද්ගලයා මත්ද්‍රව්‍යවලට ඇබ්බැහිව සිටි අයෙක් වන අතර, රක්ෂිත බන්ධනාගාර ගතව සිට ඇප මත නිදහස්ව පැමිණ සිට ඇති බවයි වැඩිදුරටත් තොරතුරු වාර්තා වුණේ.

අපරාධය සඳහා යොදාගත් විදුලි රැහැන සහ යකඩ බටය ද පොලිස් භාරයට ගෙන තිබෙනවා.