ශ්‍රී ලංකාවෙන් පළා ගොස් බ්‍රිතාන්‍ය පුරවැසිභාවය ලබාගෙන මෙරට ක්‍රියාත්මක වූ ත්‍රස්තවාදී සංවිධානයකට මුදල් එකතු කර, කොළඹ සහ වන්නි දිස්ත්‍රික්කය තුළ එම මුදල් බෙදාහැරීම සිදුකළ පුද්ගලයෙක් කටුනායක ගුවන් තොටුපොළේ දී ඊයේ (30) අත්අඩංගුවට ගෙන තිබෙනවා.
සැකකරුව එරෙහිව කොළඹ මහේස්ත්‍රාත් අධිකරණය මගින් පනවා තිබූ ගුවන් ගමන් තහනමකට අනුව ආගමන විගමන දෙපාර්තමේන්තු නිලධාරීන් විසින් මොහුව අත්අඩංගුවට ගෙන ඇති බවයි වාර්තා වුණේ.
ෂංකර් විජේසුන්දරම් නැමැති 43 හැවිරිදි මොහු කිලිනොච්චිය, උරච්චිපුරම් ප්‍රදේශයේ පදිංචිකරුවෙක්.
සැකකරු ඉකුත් 2009 වසරේ දී ශ්‍රී ලංකාවෙන් බ්‍රිතාන්‍ය වෙත පළාගොස් එරට පුරවැසිභාවය ලබාගෙන ඇති බවයි අනාවරණය වී ඇත්තේ.
බ්‍රිතාන්‍යයේ දී ඔහු මෙරට ක්‍රියාත්මක ත්‍රස්තවාදී සංවිධානයකට මුදල් එකතු කර එම මුදල් කොළඹ සහ වන්නි දිස්ත්‍රික්කය තුළ ක්‍රියාත්මක වෙමින් තිබූ එම සංවිධානයේ සාමාජිකයන් වෙත ලබාදීමට කටයුතු කර තිබෙනවා.
මේ පිළිබඳ පැමිණිලි කොළඹ අපරාධ කොට්ඨාසය වෙත ලැබී තිබූ අතර, එම කොට්ඨාසයේ නිලධාරීන් 2012.05.31 දින කොළඹ මහේස්ත්‍රාත් අධිකරණය වෙත කරුණු වාර්තාකර මොහුට එරෙහිව ගුවන් ගමන් තහනමක් ලබාගෙන තිබුණා.
මේ බව නොදත් මෙම සැකකරු ඊයේ (30) පෙරවරු 10.32ට ප්‍රංශයේ පැරිස් නුවර සිට ශ්‍රී ලන්කන් ගුවන් සේවයේ යූ.එල්.- 501 දරණ ගුවන් යානයෙන් කටුනායක ගුවන් තොටුපොළ වෙත පැමිණ තිබෙනවා.
එහිදී ආගමන විගමන දෙපාර්තමේන්තු නිලධාරීන් විසින් මොහු අත්අඩංගුවට ගෙන කටුනායක ගුවන් තොටුපොළ පොලිසිය වෙත භාර දීමට පියවර ගෙන තිබුණා.
පසුව කොළඹ අපරාධ කොට්ඨාසයේ නිලධාරීන් පිරිසක් පැමිණ මෙම පුද්ගලයා කොළඹ මහේස්ත්‍රාත් අධිකරණය වෙත ඉදිරිපත් කිරීම සදහා රැගෙන ගොස් තිබෙනවා.
