ශ්‍රී ලංකාවට පළමු ටෙස්ට් තරගයෙන් අන්ත පරාජයක්

ශ්‍රී ලංකාව සමඟ ගාල්ල ජාත්‍යන්තර ක්‍රිකට් ක්‍රීඩාංගණයේ දී පැවති පළමු ටෙස්ට් තරගය ජයගන්නට සංචාරක ඕස්ට්‍රේලියානු කණ්ඩායම අද (01) දමත් වුණා.

ශ්‍රී ලංකාව පරදා ඕස්ට්‍රේලියාව මෙම තරගය ජය ගත්තේ ඉනිමකින් සහ ලකුණු 242කින්.

ශ්‍රී ලංකා කණ්ඩායම අද ලැබූ මෙම තරග පරාජය වාර්තා අතරට එක්වන්නේ, ශ්‍රී ලංකාව සිය ටෙස්ට් ඉතිහාසයේ ඉනිමකින් ලැබූ දැවැන්තම පරාජය ලෙසටයි.

මීට පෙර ශ්‍රී ලංකාව 2017 වසරේ ඉන්දියාව ඉදිරියේ ඉනිමකින් හා ලකුණු 239 කින් පරාජයට පත්ව තිබෙනවා.

ඕස්ට්‍රේලියාව සමඟ පසුගිය 29 වනදා ආරම්භ වූ තරගයේ කාසියේ වාසිය දිනා පළමුව පන්දුවට පහරදීමට ඕස්ට්‍රේලියාව තීරණය කළා.

ඒ, අනුව ඔවුන් සිය පළමු ඉනිමට කඩුලු 06ක් දැවී ලකුණු 654ක් රැස්කරගෙන සිටිය දී ඉනිම අත්හිටුවා ශ්‍රී ලංකාවට සිය පළමු ඉනිම සඳහා ආරාධනා කළා.

එම ආරාධනයෙන් පළමු ඉනිම ක්‍රීඩා කළ ශ්‍රී ලංකාව සිය පළමු ඉනිම සඳහා සියලු දෙනා දැවී ලකුණු 165ක් රැස්කර ගත්තේ, ඕස්ට්‍රේලියානු පළමු ඉනිමට වඩා ලකුණු 486ක් පසු පසින් සිටිමින්.

අනතුරුව ඉනිමක පරාජයෙන් ගැලවීම සඳහා තරගයේ සිව්වන දිනය වූ අද දිනයේ දෙවන ඉනිම ආරම්භ කළ ශ්‍රී ලංකාවට සියල්ලන් දැවී රැස්කරගත හැකි වූයේ ලකුණු 247ක් පමණයි.

ශ්‍රී ලංකා පිතිකරුවන්ට හුරු පුරුදු ගාලු තණ තීරුවේ ඕස්ට්‍රේලියා පන්දු යවන්නන් ඉදිරියේ අසරණ වන ආකාරය දැකගත හැකි වුණා.

එහි ප්‍රථිපලයක් ලෙස අද (01) දිනයේ දී ශ්‍රී ලංකා කඩුලු 15ක් ඕස්ට්‍රේලියා පන්දු යවන්නන් විසින් දවාගැනීම විශේෂත්වයක්.

ඒ, අනුව මෙම තරගය අවසානයට තවත් දිනක් ඉතිරිව තිබිය දී ඕස්ට්‍රේලියාව දැවැන්ත ජයග්‍රහණයකින්, තරග දෙකකින් සමන්විත ටෙස්ට් තරගාවලිය එකට බිංදුවක් ලෙස පෙරමුණ ගත්තා.