වැගන් ආර් එක ලක්ෂ 72ට නගී – ඇල්ටෝ මෝටර් රථයක් ලක්ෂ 40-50 අතර මිලකට (වීඩියෝ)

වාහන ආනයන සඳහා යළි අවසර ලබාදීම සම්බන්ධයෙන් ජනාධිපතිවරයා ප්‍රමුඛ රජයට ස්තූතිවන්ත වන බව ශ්‍රී ලංකා වාහන ආනයනකරුවන්ගේ සංගමය පවසනවා.

මෙලෙස වාහනය ආනයනයට අවසර ලබාදීමත් සමඟ වාහන වෙළඳපොලේ ඇතැම් වාහනවල මිල ගණන් ඉහළ යාමක් සහ ඇතැම් වාහනවල මිල ගණන් සුළු වශයෙන් පහළ යාමක් පෙන්නුම්කර හැකි බවයි එම සංගමයේ සභාපති ප්‍රසාද් මානගේ සඳහන් කරන්නේ.

ඒ, අනුව කැබ් රථවල මිල ගණන් පහළ යා හැකි බව සඳහන් කළ සභාපතිවරයා වෑන් රථවල මිල ගණන් ඉහළ යා හැකි බවයි අද (01) පෙරවරුවේ මාධ්‍ය වෙත අදහස් දක්වමින් සඳහන් කළේ.

මේ අතර මෙරට බොහෝ පිරිසක් අතර ජනප්‍රිය මෝටර් රථයක් වන වැගන් ආර් වර්ගයේ නව රථයක් රුපියල් ලක්ෂ 72ක පමණ මුදලකට මිල දී ගත හැකි බවයි සභාපතිවරයා වැඩිදුරටත් පැවසුවේ.

එමෙන්ම ඇල්ටෝ වර්ගයේ ජපන් මෝටර් රථයක මිල ලක්ෂ 40-50 අතර මිලක් ගනු ඇති බව සඳහන් කළ ඔහු, ආනයනය කරනු ලබන ටොයෝටා ඇක්වා වර්ගයේ රථයක් ලක්ෂ 100 ඉක්මවනු ඇති බව සඳහන් කළා.

මේ අතර රජය විසින් වාහනය ආනයන සීමා ඉවත් කිරීමත් සමඟ පෙබරවරි අවසන් සතිය හෝ මාර්තු මස පළමු සතිය වන විට මෙරටට වාහන ගෙන්විය හැකි බව ද ඔහු මෙහිදී සඳහන් කර සිටියා.