බණ්ඩි පොහොර ඉදිරි කන්නයේ දී නොමිලේ ම දෙනවා – අමරවීර

එන කන්නයේ දී ගොවීන්ට අවශ්‍ය බණ්ඩි පොහොර රජය විසින් කිසිදු මුදලක් අය නොකරගෙන ලබාදෙන බව කෘෂිකර්ම අමාත්‍ය මහින්ද අමරවීර මහතා පවසනවා.

අද (28) පෙරවරුවේ තංගල්ලේ දී මාධ්‍යවේදීන් නැගූ ප්‍රශ්නවලට පිළිතුරු ලබාදෙමින් අමාත්‍යවරයා මේ බව සඳහන් කළා.

එමෙන්ම මෙම සියලු තීරණයන් ගෙන ඇත්තේ භාණ්ඩාගාරය සහ ජාත්‍යන්තර මූල්‍ය අරමුදලේ ගිවිසුම් ප්‍රකාරව බවට ද කෘෂිකර්ම අමාත්‍යවරයා කියා සිටියා.

මේ අතර රබර් වගාව සඳහා රුපියල් 4,000ක පොහොර සහනාධාරයක් ලබාදීමට ද කෘෂිකර්ම අමාත්‍යංශය තීරණය කර ඇති බවට තොරතුරු වාර්තා වනවා.

එම පොහොර සහනාධාරය මෙම සතියේ සිට ම ලබාදීමටයි පියවර ගෙන ඇත්තේ.

වාර්ෂික රබර් කිරි අස්වැන්න මෙට්‍රික් ටොන් ලක්ෂයේ සිට මෙට්‍රික් ටොන් 65,000 දක්වා අඩු වී ඇති බව කෘෂිකර්ම දෙපාර්තමේන්තුව ප්‍රකාශ කරන අතර; රබර් වගාව සඳහා යොදන කිලෝග්‍රෑම් 50ක පොහොර මල්ලක් රුපියල් 9,500 සිට රුපියල් 5,500ක් දක්වා මිල අඩු කිරීමට පියවර ගන්නා ලෙසට මේ හේතුව මත කෘෂිකර්ම අමාත්‍යවරයා දැනුම්දී තිබෙනවා.