ජාත්යන්තර මූල්ය අරමුදල විසින් බංග්ලාදේශය සමඟ නව ණය වැඩසටහනක් සම්බන්ධයෙන් ඉදිරි සාකච්ඡා පැවැත්වීමට සූදානම් වන අතරම, එරට ආර්ථික වර්ධන වේගය තවදුරටත් මන්දගාමී වනු ඇති බවට පුරෝකථනය කර ඇති බව රොයිටර් පුවත් සේවය වාර්තා කරන්වා.
බංග්ලාදේශයේ පවතින දේශපාලන පරිවර්තනයන්, මෑතකාලීන සමාජීය නොසන්සුන්තාවන් සහ සාර්ව ආර්ථික අභියෝග සැලකිල්ලට ගනිමින් මූල්ය අරමුදල මෙම නවතම ආර්ථික ඇගයීම සිදුකර තිබෙනවා.
මූල්ය අරමුදලේ නිල නිවේදනය පෙන්වා දෙන්නේ බංග්ලාදේශයේ වත්මන් ආර්ථික ස්ථාවරත්වය රැකගැනීම සඳහා දැඩි ප්රතිසංස්කරණ මාලාවක් අත්යවශ්ය වන බවයි.
විශේෂයෙන්ම එරට විදේශ විනිමය සංචිත පහත වැටීම පාලනය කිරීම, උද්ධමනය පාලනය කිරීම සහ රාජ්ය ආදායම් කළමනාකරණය ශක්තිමත් කිරීම කෙරෙහි මෙහිදී මූලික අවධානය යොමු කෙරෙනවා.
බංග්ලාදේශයේ අන්තර්වාර රජය හෝ නව පාලනාධිකාරිය සමඟ ඉදිරියේදී පැවැත්වීමට නියමිත මෙම සාකච්ඡා වටය හරහා, එරට මූල්ය අර්බුදයෙන් ගොඩ ඒමට අවශ්ය සහයෝගය සහ කොන්දේසි සහිත නව මූල්ය පහසුකම් පිළිබඳව අවසන් එකඟතාවලට එළඹීමට නියමිතයි.
කෙසේ වෙතත්, පවතින දේශීය හා බාහිර ආර්ථික පීඩනයන් හමුවේ බංග්ලාදේශයේ ඉදිරි දදේනි වර්ධන වේගය කලින් අපේක්ෂා කළ මට්ටමට වඩා සැලකිය යුතු ලෙස මන්දගාමී වනු ඇති බවට ජාත්යන්තර මූල්ය අරමුදල අනතුරු අඟවනවා.
ඇඟලුම් අපනයන ක්ෂේත්රයේ පවතින මන්දගාමීත්වය සහ දේශීය පාරිභෝගික ඉල්ලුම සීමා වීම මීට ප්රධාන වශයෙන් බලපා ඇති අතර, ආර්ථිකය ස්ථාවර මාවතකට ගැනීමට නම් මූල්ය ප්රතිපත්ති තවදුරටත් දැඩි කිරීමට සහ බැංකු ක්ෂේත්රයේ පවතින දුර්වලතා වහාම නිවැරදි කිරීමට බංග්ලාදේශ බලධාරීන්ට සිදුවනවා.
