මැදවච්චිය පොලිසියේ නිලධාරීන් පිරිසක් සිදු කළ පහර දීමකින් බරපතල තුවාල ලබා රෝහල්ගත කළ තරුණයකුගේ වෘෂණ කෝෂයක් ඉවත් කර තිබෙනවා.
අප වාර්තාකරු පැවසුවේ අනුරාධපුර, මැදවච්චිය පොලිසියේ නිලධාරින් පිරිසක් සිදුකළ පහරදීමකින් බරපතල තුවාල ලැබූ තරුණයෙකු රෝහල්ගත කර ඇති බවයි.
මෙලෙස බරපතල තුවාල ලබා ඇත්තේ මැදවච්චිය, තුලාවේලි ගම්මානයේ පදිංචි 23 හැවිරිදි දිලීෂ සංජීව නමැති තරුණයෙකි.
පසුගිය 07 වැනිදා සිය ලොරි රථය අලුත්වැඩියාවක් සඳහා යමින් සිටියදී ඒ පසුපස හඹා පැමිණි මැදවච්චිය පොලිසියේ රථවාහන අංශයේ නිලධාරීන් දෙදෙනකු විසින් එම ලොරි රථය නවතා එහි රියදුරු වන දිලීෂ සංජීවට හා ලොරි රථයේ ගමන් ගත් ඔහුගේ යහළුවාට පහර දී තිබෙනවා.
ඉන්පසුව ත්‍රීවිල් රථයකින්ද එම ස්ථානයට පැමිණි පොලිස් නිලධාරීන් පිරිසක් මොවුන් දෙදෙනාට පහර දී බරපතල තුවාල සිදුකොට ඇති බවයි දිලීෂ සංජීවගේ මව පවසන්නේ.
පසුව බරපතල තත්ත්වයේ සිටි දිලීෂ සංජීව තරුණයාව මැදවච්චිය රෝහලටත් ඉන් අනතුරුව වැඩිදුර ප්‍රතිකාර සඳහා අනුරාධපුර ශික්ෂණ රෝහලට ඇතුළත් කර තිබෙනවා.
ඔහුගේ මව පවසන්නේ එහිදී තම දරුවාට සිදුකළ ශල්‍ය කර්මයකදී දරුවාගේ වෘෂණ කෝෂයක් ඉවත් කර ඇති බවයි.
මෙම තරුණයා තවදුරටත් අනුරාධපුර ශික්ෂණ රෝහලේ ප්‍රතිකාර ලබමින් සිටින අතර මව පවසන්නේ මෙම දරුවාට සාධාරණයක් ඉටු කරන ලෙසයි.
