පැමිණිල්ලක් විභාග කිරීමට ගිය කොස්තාපල්වරයෙකුට පහර දී, ට්රැක්ටර් රථයකට යට කිරීමට තැත් කළ පියා සහ පුතුන් තුන් දෙනෙකු පොලිස් අත්අඩංගුවට ගෙන තිබෙනවා.
අද දහවල් හොරොව්පොතාන, යාන්ඔය හංදියේ දී යි සැකකරුවන් අත්අඩංගුවට ගැනුණේ.
මෙලෙස අත්අඩංගුවට ගෙන ඇත්තේ හොරොව්පොතාන රත්මලේ ප්රදේශයේ පදිංචි අවුරුදු 50, 31, 29, 22 යන වයස්වල පසු වූ පියෙකු සහ පුතුන් තිදෙනෙක්.
ග්රාම නිලධාරීවරයෙකු විසින් සැකකරුවන්ට එරෙහිව කරන ලද පැමිණිල්ලක් විභාග කිරීමට ගිය අවස්ථාවේ දී යාන්ඔය හංදියේ පිහිටි සැකකරුවන්ගේ නිවස ඉදිරිපිට දී පොලිස් නිලධාරියාට මෙම පහරදීම සිදුව තිබෙනවා.
යාන්ඔය හංදිය ප්රදේශයේ පිහිටි තම ඉඩමට පිවිසෙන මාර්ගයේ තිබූ බෝක්කු බට 3ක් පසුගිය දා පැවැති අධික වර්ෂාවත් සමඟ ගලවා ඉවත් කළ අතර, ජලය බැස යාම හේතුවෙන් නැවත තමන් එම බෝක්කු බට සවිකිරීමට යාමේදී සැකකරුවන් ඊට එරෙහි වීම හේතුවෙන් ග්රාම නිලධාරිවරයා දින කිහිපයකට පෙර පොලිසියට පැමිණිලි කර ඇතැයි සඳහන්.
කොස්තාපල්වරයා පහරකෑමට ලක්ව ඇත්තේ එම පැමිණිල්ල විභාග කිරීමට ගිය අවස්ථාවේදී යි.
සැකකරුවන් කොස්තාපල්වරයාට පහර දී අතේ බැඳි ඔරලෝසුව හා නිල ඇඳුමේ බොත්තම් කීපයක් කඩා දමා ට්රැක්ටර් රථයකට යට කිරීමට උත්සාහ කර ඇති බව අනාවරණය වී තිබෙනවා.
පහරකෑමට ලක්වූ කොස්තාපල්වරයා අද දහවල් ප්රතිකාර සඳහා හොරොව්පොතාන රෝහලට ඇතුළත් වී තිබුණා.
සැකකරුවන් හෙට කැබිතිගොල්ලෑව මහෙස්ත්රාත් අධිකරණයට ඉදිරිපත් කිරීමට නියමිතයි.
හොරොව්පතාන පොලිසිය විසින් වැඩිදුර පරීක්ෂණ සිදු කරනවා.