ප්‍රමිතිගත වී රුපියල් 100ට වඩා අඩු මිලකට අලෙවි නොකරන ලෙස කෘෂිකර්ම නියෝජ්‍ය අමාත්‍ය නාමල් කරුණාරත්න ගොවිජනතාවට දැනුම් දෙනවා.
වී මිල දී ගැනීම වෙනුවෙන් රජයේ ගබඩා විවෘත කර ඇති බවත්, රජය විසින් නියමකර ඇති බිල ගණන්වලට වී තොග මිල දී ගැනීමට පෞද්ගලික අංශය ද එකඟ වී ඇති බවයි නියෝජ්‍ය අමාත්‍යවරයා පවසන්නේ.
ඒ, අනුව ගොවියන් සතුව පවතින ප්‍රමිතිගත වී රුපියල් 100ට වඩා අඩු මිලකට අලෙවි නොකරන ලෙසයි ඔහු දැනුම් දෙන්නේ.
මේ අතර අහිංසක ගොවියන්ගේ වී, රජය නියමකර ඇති මිල ගණන්වලට වඩා අඩු මිල ගණන්වලට මිල දී නොගන්නා ලෙසට පෞද්ගලික අංශයේ වී මිලදී ගන්නා පුද්ගලයින්ට නියෝජ්‍ය අමාත්‍යවරයා අවධාරණය කරනවා.
අද (13) මාධ්‍ය වෙත අදහස් දක්වමින් නියෝජ්‍ය අමාත්‍ය නාමල් කරුණාරත්න මේ බව සඳහන් කළා.
එමෙන්ම සහල් සහ වී සඳහා පනවා තිබූ කොන්දේසි මේ වනවිට ඉවත්කර ඇති බව සඳහන් කළ ඔහු, සහල් නිෂ්පාදනයට පමණක් නොව සත්ව ආහාර නිෂ්පාදනය වැනි වෙනත් අතුරු නිෂ්පාදන සඳහා වී මිල දී ගැනීමට මේ වනවිට හැකියාව පවතින බවද ඔහු මෙහිදී අවධාරණය කළා.
