ඉන්දියාවේ සිට මෙරටට කුඩා ප්‍රමාණයේ ඩිංගි යාත්‍රාවකින් රැගෙන එමින් තිබූ බීඩිකොළ කිලෝග්‍රෑම් 539 ක් නාවුක හමුදාවේ කල්පිටිය විජය කඳවුරේ නිලධාරීන් විසින් තම භාරයට ගෙන තිබෙනවා.
දසත අධිකරණ වාර්තාකරු පැවසුවේ; අද (23) අලුයම 12.10ට පමණ කල්පිටිය – ඉලිප්පන්දූව දුපත ආසන්නයේ දී මෙම වැටලීම සිදු කර ඇති බවයි.
බීඩි කොළ තොගය ඉන්දියාවේ සිට මුහුදු මාර්ගයෙන් මෙරටට ගෙන ආ බව කියන සැකකරුවන් දෙදෙනෙකු ද නාවුක හමුදාවේ නිලධාරීන් විසින් අත්අඩංගුවට ගනු ලැබුවා.
සැකකරුවන් කල්පිටිය – ජනසවිපුර ප්‍රදේශයේ පදිංචි වයස අවුරුදු 23 සහ 25 වියේ පසුවන අය බවයි පැවසෙන්නේ.
සැකකටයුතු ඩිංගි යාත්‍රවක් ඉලිප්පන්දූව දූපත දෙසට ගමන් කරන ආකාරය රාත්‍රී මුර සංචාරයේ නිරත වෙමින් සිටි නාවුක හමුදා නිලධාරීන් දැක ඇති අතර පසුව එම යාත්‍රාව හඹා ගොස් එය පරීක්ෂා කිරීමට නාවුක හමුදා නිලධාරීන් කටයුතු කරනු ලැබුවා.
යාත්‍රාවේ තිබී බීඩි කොළ තොගය සොයා ගෙන ඇත්තේ එම අවස්ථාවේදීයි.
බීඩි කොළ තොගය පොලිතින් මළු 18 ක අසුරා තිබූ බවත් එම බීඩිකොළ සමග ඩිංගි යාත්‍රාව ද සැකකරුවන් සමග කල්පිටිය විජය නාවුක හමුදා කඳවුරේ තබා ඇති බවත් ඉදිරි විමර්ශන කටයුතු සිදු කිරීමට නියමිත බවත් වාර්තා වනවා.
