කොටපොළ ප්‍රාදේශීය ලේකම් කොට්ඨාසයේ කොස්මෝදර වෙළේ ගෙදර, කොස්මෝදර, කොටපොළ ලිපිනයේ පදිංචි ජාලත්ගේ නෙතුල නෙත්සර නැමති 6හැවිරිදි පුංචි පුතාට තමන්‍ගේ ආදරණීය මෑණියන්ගේ උණුසුම අහිමි වන්නේ ඔහුට අවුරුදු එක හමාරක් වන විටය.එතැන් සිට ඔහු ඇතිදැඩි වූයේ තාත්තගේ හා ආච්චි අම්මාගේ සෙවනේය. නෙතුලගේ පියා ගම්පහ ප්‍රදේශයේ ඉදිකිරීම් වැඩ පොළක සේවය කර ඇත.
ඉකුත් 14 වනදා රාත්‍රී ඔහු දුරකතන ඇමතුමක් දී පුතුට පවසා ඇත්තේ පුතාට සෙල්ලම් කිරීමට ඩෝසරයක් ගේන්නම් කියාය. ඉස්කෝලෙට ඕන කරන බඩුටික ණයට ගන්න කියන්න ආච්චිට තාත්තා ඇවිත් ණය ටික බේරන්නම් පවසා ඇත.එහෙත් පසුදා උදෑසන වනවිට නිදියහනේදීම නෙතුලගේ පියා වන 32 හැවිරිදි ජේ ප්‍රියන්ත මෙලොව හැර ගොස් තිබුණි.15 දහවල් වන විටත් මරණයට හේතුවක් සොයා ගැනීමට නොහැකි විය.
දෙමාපියන් දෙදෙනාම අහිමි නෙතුල පුතු මොන්ටිසෝරියේ ටීචර් හා ආච්චි අම්මාත් එක්ක ඇවිත් දෙනියාය කලාපයේ ඉලුක්පිටිය කනිෂ්ඨ විද්‍යාලය 1 ශ්‍රේණියට ඇතුළත් කිරීම එතන හිටපු හැමෝගෙම ඇස් වලට කඳුලක් ගෙනාවා.
