නිවාස බිඳ දේපොළ, මුදල් සොරකම් කිරීම, රන්මාල කොල්ලකෑම සහ රාජ්‍ය බැංකුවක මුදල් සොරකම් කිරීමට තැත් කළ පුද්ගලයෙකු අද (16) දින අනුරාධපුර පොලිසිය විසින් අත්අඩංගුවට ගනු ලැබුවා.
අනුරාධපුර කොට්ඨාස භාර ජ්‍යේෂ්ඨ පොලිස් අධිකාරී තිළිණ හේවාපතිරණ මහතාගේ උපදෙස් එහි අපරාධ විමර්ශන අංශය මගින් අදාළ මෙහෙයුම සිදු කර තිබෙනවා.
සැකකරු අත්අඩංගුවට ගන්නා විට රුපියල් ලක්ෂ 50කට වැඩි රන් බඩු තොගයක්, උණු කළ රත්තරන් ග්‍රෑම් 128ක්, කඩුවක්, සොරකම් සඳහා යොදා ගන්නා උපකරණ කිහිපයක් ඇතුළු හෙරොයින් මත්කුඩු ද සොයා ගැනුණු බවයි වාර්තා වන්නේ.
අනුරාධපුර – තන්නායම්කුලම හි පදිංචි 31 හැවිරිදි දෙදරු පියෙකු මෙලෙස අත්අඩංගුවට ගැනුණා.
හෙරොයින් මත්කුඩු පානයට තදින් ඇබ්බැහි වී ඇති පුද්ගලයෙකු නිවසක් ඉදි කරන බවට ලැබුණු තොරතුරකට අනුව සැකකරු අත්අඩංගුවට ගෙන සිදු කළ විමර්ශනයක දී සොරකම් කරන ලද රන්මාලයක්, පෙණ්ඩනයක්, කරාබු ජෝඩුවක්, සැකකරුගේ නිවසේ තිබී සොයාගෙන තිබෙනවා.
එම සැකකරුගෙන් සිදු කළ වැඩිදුර ප්‍රශ්න කිරීම්වල දී මෙම කොල්ලකෑම් සඳහා යොදා ගන්නා ලද කඩුවක්, ගයින්ඩරයක්, අඩුවක්, මූණ වසා ගැනීමට යොදා ගන්නා රෙදි කැබැල්ලක් ,ජැකට්ටුවක් ඇතුළු උපකරණ රාශියක් පොලිස් භාරයට ගැනීමට කටයුතු කර ඇති බවයි පැවසෙන්නේ.
අත්අඩංගුවට ගත් සැකකරු සොරකම් කරන ලද භාණ්ඩ අනුරාධපුර නගරයේ ස්ථාන දෙකකට අලෙවි කර රුපියල් ලක්ෂ තිහකට ආසන්න මුදලක් ලබාගෙන තිබූ බවත් එම මුදලින් නිවස අලුත්වැඩියා කරන අතරවාරයේ, සැකකරු දිනපතා රුපියල් 32,000ක මුදලක් වියදම් කර හෙරොයින් මත්කුඩු පානය සිදු කරන බව සැකකරුගෙන් සිදු කළ වැඩිදුර ප්‍රශ්න කිරීම්වල දී අනාවරණය වූ බව ද පොලිසිය පවසනවා.
අත්අඩංගුවට ගත් සැකකරු අනුරාධපුර මහේස්ත්‍රාත් අධිකරණයට ඉදිරිපත් කිරීමට නියමිතයි.
