පළාත් පාලන ඡන්ද විමසීම සඳහා ඉදිරිපත් කළ නාමයෝජනා ප්‍රතික්ෂේප කිරීමට එරෙහිව ගොනු කර තිබූ රිට් පෙත්සම් 53ක් සහ මූලික අයිතිවාසිකම් පෙත්සම් 06ක් නිෂ්ප්‍රභ කිරීමට ශ්‍රේෂ්ඨාධිකරණයෙන් අද (04) නියෝග කළා.
නීතිපතිවරයා විසින් ඉදිරිපත් කර තිබූ මූලික විරෝධතා සැලකිල්ලට ගනිමින් ශ්‍රේෂ්ඨාධිකරණ විනිසුරු මඬුල්ල මෙම නියෝගය ලබා දුන්නා.
නීතිපතිවරයා වෙනුවෙන් පෙනී සිටි නියෝජ්‍ය සොලිස්ටර් ජනරාල් කණිෂ්කා ද සිල්වා පළාත් පාලන පනතේ විධිවිධානයන්ට අනුකූලව පළාත් පාලන ඡන්ද විමසීමකට අදාළ නාමයෝජනා පත්‍ර ප්‍රතික්ෂේප වීමක් හෝ තේරීම් භාර නිලධාරියවරයා විසින් ඉටු කරනු ලබන කටයුත්තක් සම්බන්ධයෙන් ශ්‍රේෂ්ඨාධිකරණය හමුවේ රිට් පෙත්සම් ඉදිරිපත් කිරීමට හැකියාවක් නොමැති බවත් ඇය අවධාරණය කළා.
එවැනි රිට් පෙත්සම් අභියෝගයට ලක් කළ හැක්කේ අභියාචනාධිකරණය හමුවේ බවත් මෙම පෙත්සම් විභාග කිරීමට ශ්‍රේෂ්ඨාධිකරණයට බලයක් නොමැති බවත් ඇය පෙන්වා දුන්නා.
පෙත්සම්හි නියෝගය ශ්‍රේෂ්ඨාධිකරණ විනිසුරුවරුන් වන එස් තුරෛයිරාජා, මහින්ද සමයවර්ධන සහ සම්පත් අබේකෝන් යන විනිසුරු මඬුල්ල ප්‍රකාශයට පත්කළා.
ජන අරගල සංවිධානය, ස්වාධීන කණ්ඩායම්, ශ්‍රී ලංකා මුස්ලිම් ක්‍රොංගසය සහ ඉලංගෛයි තමිල් අරසුකච්චි ඇතුළු මෙවර පළාත් පාලන මැතිවරණයට ඉදිරිපත් වී සිටින තවත් පක්ෂ සහ ස්වාධීන කණ්ඩායම් කිහිපයක් මෙම පෙත්සම් ගොනු කර තිබුණා.
පෙත්සම්වල වගඋත්තරකරුවන් ලෙස මැතිවරණ කොමිසම ඇතුළු පිරිසක් නම් කර තිබුණා.
