නවසීලන්ත කාන්තා කණ්ඩායම සහ ශ්‍රී ලංකා කාන්තා කණ්ඩායම අතර තුන්වන සහ අවසන් විස්සයි විස්ස තරගය වර්ෂාව හේතුවෙන් අතහැර දැමීමට සිදු වුණා.
නවසීලන්තයේ ඩනෙඩින් හිදී ආරම්භ වූ මෙම තරගය ක්‍රියාත්මක කිරීමට හැකි වුයේ පන්දුවාර 14යි එක් පන්දුවක් පමණයි.
ක්‍රීඩාංගණයට ඇද හැලුණු වර්ෂාවත් සමඟ තරගය ප්‍රමාද වී ආරම්භ වූ අතර, එහිදී එක් ඉනිමක් පන්දුවාර 15කට සීමා වුණා.
අනතුරුව තරගයේ කාසියේ වාසිය දිනූ ශ්‍රී ලංකා කාන්තා කණ්ඩායම පළමුව පන්දුවට පහරදීමේ අවස්ථාව නවසීලන්ත කාන්තා කණ්ඩායමට ලබාදුන්නා.
එහිදී ඔවුන් පන්දුවාර 14යි එක්පන්දුවක් තුළ කඩුලු 03ක් දැවී ලකුණු 101ක් ලබා සිටිය දී තරගයට වර්ෂාවෙන් බාධා එල්ල වුණා.
වර්ෂාවත් සමඟ තරගය යළි ආරම්භ කිරීමට අවස්ථාවක් හිමි නොවූ අතර, ඒ අනුව තරග අතහැර දැමීමටයි සිදු වුණේ.
ඒ, අනුව තරග තුනකින් සමන්විත විස්සයි විස්ස තරගාවලිය ජය පරාජයෙන් තොරව අවසන් වුණේ කණ්ඩායම් දෙකම එක තරගය බැගින් ජයගෙන තිබූ පසුබිමකයි.
දෙරට අතර පැවති පළමු 20-20 තරගය ශ්‍රී ලංකා කාන්තා කණ්ඩායම ජයගත් අතර, දෙවන තරගය ජයගත්තේ නවසීලන්ත කාන්තා කණ්ඩායමයි.
