සංචාරක ශ්‍රී ලංකා කණ්ඩායමට එරෙහි පළමු ටෙස්ට් තරගයේ දෙවැනි දිනය නිමා කරන විට සත්කාරක දකුණු අප්‍රිකානු කණ්ඩායම සිය දෙවැනි ඉනිමට කඩුලු 03ක් දැවී ලකුණු 132ක් ලබා සිටියා.
ඊයේ (27) ඩර්බන් හි දී ආරම්භ වූ තරගයේ ශ්‍රී ලංකා කණ්ඩායමේ ඇරයුමෙන් පළමු ව පන්දුවට පහර දුන් දකුණු අප්‍රිකාව සිය පළමු ඉනිමට සියල්ලන් ම දැවී රැස් කළේ ලකුණු 191ක් පමණයි.
ශ්‍රී ලංකා කණ්ඩායමේ පන්දු බලඇණිය සිය පළමු ඉනිම වෙනුවෙන් නායකයාගේ තීරණය සාධාරණීකරණය කරන්නට කැප වූ අයුරු දකුණු අප්‍රිකානු කඩුලු බිඳ වැටීමේ දී දක්නට ලැබුණා.
ඒ අනුව අද (28) දිනයේ දී සිය පළමු ඉනිම ඇරඹූ ශ්‍රී ලංකා පිතිකරුවන්ට අමතක නොවන පන්දු යැවීමක නිරත වූ දකුණු අප්‍රිකා වේග පන්දු බලඇණියේ මාර්කෝ ජැන්සන් ලකුණු 13කට කඩුලු 07ක් බිඳ දැමුවේ ශ්‍රී ලංකාව අන්ත අසරණ කරමින්.
මාර්කෝ ජැන්සන් අද බිඳ දැමුවේ තමන් ටෙස්ට් පිටියක යවා ඇති විශිෂ්ටතම පන්දු යැවීමේ තම වාර්තාවයි.
මීට පෙර එංගලන්තයට එරෙහිව ලකුණු 35කට කඩුලු 05ක් දවාගෙන සිටි ජැන්සන් එය වෙනස් කරගත්තේ ශ්‍රී ලංකා ජ්‍යේෂ්ඨතම පිතිකරුවන් මංමුලා කරමින්.
ඒ අනුව දකුණු අප්‍රිකානු පන්දු බලඇණිය හමුවේ ශ්‍රී ලංකාව එතෙක් මෙතෙක් ටෙස්ට් පිටියේ තමන් ලබාගත් අවම ලකුණු සංඛ්‍යාව වන ලකුණු 42කට දැවී ගියා.
ඒ දකුණු අප්‍රිකානු කණ්ඩායමට වඩා පළමු ඉනිමෙන් තවත් ලකුණු 149ක් පසුපසට ඇද වැටෙමින්.
ඉන් අනතුරුව යළිත් සිය දෙවැනි ඉනිමට පිතිකරණය ඇරඹූ දකුණු අප්‍රිකානු කණ්ඩායමේ මුල් කඩුලු 03 දවාගන්නට ප්‍රභාත් ජයසූරිය (02*) සහ විශ්ව ප්‍රනාන්දු සමත් වූ අතර දිනය අවසන් කළේ සිව්වැනි කඩුල්ලට ස්ටබ්ස් සහ නායක බවුමා පිටියේ රැඳී සිටිමින්.
ඒයිඩ්න් මාක්‍රම් ලකුණු 47ක් ලබා ගත්තා.
දෙවැනි දිනය නිමාවන විට දකුණු අප්‍රිකාව ශ්‍රී ලංකාවෙ පළමු ඉනිමට වඩා ලකුණු 281ක් ඉදිරියෙන් සිටිනවා.
හෙට (29) තරගයේ තෙවැනි දිනයයි.
