දුම්රිය වෘත්තීය සමිති වර්ජනයකට සැරසෙයි

ඉල්ලීම් කිහිපයක් මුල් කර ගනිමින් ලබන 14 වැනිදා මධ්‍යම රාත්‍රියේ සිට පැය 24ක එක්දින වර්ජනයක් සිදු කරන බව දුම්රිය වෘත්තීය සමිති සන්ධානය පවසනවා.

එම සන්ධානයේ සම කැඳවුම්කරු එස්.පී විතානගේ මහතා අද (09) කොළඹ පැවති මාධ්‍ය හමුවකට එක් වෙමින් කියා සිටියේ බදු ඉහළ නැංවීමට එරෙහි වීම ඇතුළු ඉල්ලීම් කිහිපයක් මුල් කර ගනිමින් මෙම විරෝධතාව සිදු කරන බවයි.

එම වර්ජනය සඳහා දුම්රිය වෘත්තීය සමිති සන්ධානය නියෝජනය කරන සංගම් 29ක් එක්වන බව ද ඔහු වැඩිදුරටත් සඳහන් කළා.

මේ අතර සරසවි සිසුන්ට පහරදීම සහ පනවා ඇති බදුවලට එරෙහිව විරෝධය පළකරමින් අද සිට අඛණ්ඩ වැඩ වර්ජනයක නිරතවන බව විශ්ව විද්‍යාල ආචාර්යවරුන්ගේ සංගමය ද ප්‍රකාශ කර තිබෙනවා.