පොසොන් පොහොය දිනය නිමිත්තෙන් දිවයිනේ ප්‍රමුඛතම මාධ්‍ය ජාලයක් වූ දසත මාධ්‍ය ජාලය හා මෙත්මුනි සෑ තරුණ දම් සභාව එක්ව සංවිධානය කරන, දසත බෝපත මෙත්මුනි මහාසෑ පොසොන් කලාපය සත් දිනක් පුරා අලව්ව – මහාරච්චිමුල්ල මෙත්මුනි සෑ පින්බිමේ දී සිදු කෙරෙනවා.
මෙහි දී සැදැහැවත් ඔබ සැමට ගෞතම බුදු රජාණන් වහන්සේගේ නිසැක උත්තම ධාතුන් වහන්සේ වැඳ පුදා ගැනීමට අද (22) සිට අවස්ථාව හිමිවනවා.
දසත බෝපත පොහෝ දින විශේෂ වැඩසටහනට සමගාමීව අලව්ව – මහාරච්චිමුල්ල මෙත්මුනි සෑයේ තැන්පත් කිරීම පිණිස මාතර සිට අලව්වට දින හතක් පුරා රථ පෙරහැරකින් වැඩම කර වූ බුදුන් වහන්සේගේ සර්වඥ ධාතූන් වහන්සේ වැඩමවා ලූ රිය පෙරහර ඊයේ (21) පස්වරුවේ අලව්ව – මහාරච්චිමුල්ල මෙත්මුනි මහාසෑ පුදබිමට ළඟා වුණා.
ඒ මහා සංඝරත්නය සියක් නමක් පෙරටු කර ගනිමින්.
තායිලන්තයේ සිට මෙරටට වැඩම කර වූ සම්බුදු පියාණන්ගේ නිසැක උත්තම ශ්‍රී සර්වඥ ධාතුන් වහන්සේ ඇතුලු උත්තම ධාතුන්වහන්සේ රැගත් රිය පෙරහැර ගමන් ආරම්භ කළ මොහොතේ සිට මග දෙපස රැස්වූ අති විශාලබෞද්ධ ජනතාව ඊට
දැක්වූවේ සුවිශේෂි වූ ගෞවරයක්.
එසේ වැඩම කරවන ලද නිසැක ශ්‍රී උත්තම සර්වඥ ධාතූන් වහන්සේ, දසත මාධ්‍ය ජාලයේ කළමනාකාර අධ්‍යක්ෂ, සුප්‍රීම් දසත අධ්‍යක්ෂ පී.එස්. මධුශංක මහතාගේ සුරතින් අලව්ව – මහාරච්චිමුල්ල මෙත්මුනි මහාසෑ පින්බිමේ ධාතු මන්දිරයේදී තැන්පත් කිරීම සිදු කෙරුණා.
ඒ අනුව තායිලන්තයෙන් මෙරටට වැඩම වූ ගෞතම බුදුරජාණන් වහන්සේගේ සහ මහ රහත් ධාතුන් වහන්සේ 15 නමක් පින් සිතින් වන්දනා කිරීමට සුවහසක් බෞද්ධ ජනතාවට තව දින 6 ක් අවස්ථාව උදා වනවා.
එලෙසම, ලංකාවේ අලංකාරම හා දැවැන්තම පොසොන් තොරණ් රාජයා දැක බලා ගැනීමටත්, මෙත්මුණි මහ සෑ පුදබිමට පැමිණෙන ඔබට හැකිවනවා.
