ඉන්දියාවේ ආන්ද්‍රා ප්‍රදේශ් ප්‍රාන්තයේ සුප්‍රසිද්ධ කෝවිලක් වන තිරුමාලා කෝවිල වැඳ පුදා ගැනීමට ගිය හය හැවිරිදි දැරියක් අවාසනාවන්ත ලෙස ජීවිතක්ෂයට පත්වූ පුවතක් එරට මාධ්‍ය වාර්තා කරනවා.
දැරිය තිරුමාලා කෝවිල වෙත යන මාර්ගයේ දී දිවියෙකුගේ ප්‍රහාරයකට ලක්වීමෙන් මෙලෙස ජීවිතක්ෂයට පත්ව ඇති බවයි වාර්තා වන්නේ.
පසුගිය සිකුරාදා සවස ලක්ෂිතා නැමැති මෙම කුඩා දැරිය සිය දෙමාපියන් සමඟ කෝවිල වෙත ගොස් ඇති අතර, දැරිය ගමන් කරමින් සිය ඇත්තේ මව්පියන්ට වඩා මඳක් ඉදිරියෙන් බවයි වාර්තා වුණේ.
පසුව ඇයගේ මව්පියන් විසින් දැරිය අතුරුදන් බවට දැනගැනීමත් පසු ඇයව සෙවීම ආරම්භ කර තිබෙනවා.
ඒ, අනුව සිදුකළ සෝදිසි මෙහෙයුමේ දී මෙම කඳුකර පුදබිමට පිවිසෙන මාර්ගයේ අසල කැලෑ ප්‍රදේශයක තිබී දැරියගේ සිරුර ඊයේ සොයාගෙන ඇති බවයි ඉන්දීය මාධ්‍ය වාර්තා කළේ.
එලෙස සොයාගත් දැරියගේ සිරුරේ තිබූ තුවාලවලින් සත්ව ප්‍රහාරයක් පෙන්නුම් කරන බවයි පොලිසිය සඳහන් කළේ.
මීට පෙර ද පසුගිය ජුනි මාසයේදී තුන් හැවිරිදි පිරිමි දරුවෙක් මෙම මාර්ගයේ දී දිවියන්ගේ ප්‍රහාරයට ලක් ඇති අතර, වාසනාවකට ඔහුට දිවි බේරාගැනීමට හැකිව තිබෙනවා.
