තණමල්විල ජාතික පාසලේ තවත් සිසුවියක් අපයෝජනය කරයි

සිසුන් විසි දෙකක් එක්ව තණමල්විල ජාතික පාසලේ සිසුවියක සමූහ දූෂණයට ලක්කර මසක් යන්නත් පෙරින් එම පාසලෙන්ම තවත් එවැනිම අවාසනාවන්ත පුවතක් අද (07) වාර්තා වුණා.

තණමල්විල ජාතික පාසලේ ඉගෙනුම ලබන තවත් දැරියක එම පාසලේම සිසුවෙකු විසින් අපයෝජනය කිරීමේ සිද්ධියක් සම්බන්ධයෙන් සැකකාර සිසුවා අද (07) තණමල්විල පොලිසිය විසින් අත්අඩංගුවට ගැණුනා.

මෙලෙස අපයෝජනයට ලක්ව ඇත්තේ වයස අවුරුදු 14 ක් වූ තණමල්විල ජාතික පාසලේ 09 ශ්‍රේණියේ ඉගෙනුම ලබන බාල වයස්කාර සිසුවියක්.

සිද්ධිය සම්බන්ධයෙන් තණමල්විල පොලිස් ස්ථානාධිපතිවරයාට ලද තොරතුරකට අනුව සිදුකළ විමර්ශනයක දී මේ පිළිබඳව අනාවරණය වුණා.

දැරිය පොලිසියට ගෙන්වා සිදුකළ ප්‍රශ්න කිරීම්වල දී දැරිය සිද්ධිය සම්බන්ධයෙන් තොරතුරු අනාවරණය කර ඇති බවයි වාර්තා වන්නේ.

සිසුවිය තණමල්විල ප්‍රදේශයේ පදිංචි සිය මිත්තනියගේ නිවසට ගිය අවස්ථාවේ එම පාසලේම 11 ශ්‍රේණියේ ඉගෙනුම ලබන සිසුවෙකු විසින් දැරියව අපයෝජනය කර ඇති බවයි වාර්තා වුණේ.

සැකකාර සිසුවා මේ වනවිට අත්අඩංගුවට ගෙන ඇති අතර, දැරිය වෛද්‍ය පරීක්ෂණ කටයුතු සඳහා යොමු කර තිබෙනවා.

සිද්ධිය සම්බන්ධයෙන් තණමල්විල පොලිසිය විමර්ශන ආරම්භ කර ඇති අතර පාසලේ විදුහල්පතිවරයාගෙන් හා විනයභාර ආචාර්‍යවරයාගෙන් ද ප්‍රකාශ සටහන් කරගෙන ඇති බවයි අප වාර්තාකරු පවසන්නේ.