ගම්පහ දිස්ත්‍රික්කය තුළ පැතිර යන ඩෙංගු රෝගය පාලනය කිරීම සදහා අවශ්‍ය නම් අතුරු දීමනාවකින් තොරව දිවයින පුරා සිටින තම සාමාජිකයින් ඒ සඳහා යෙදවීමට හැකියාව ඇති බව මහජන සෞඛ්‍ය පරීක්ෂකවරුන්ගේ සංගමයේ සභාපති උපුල් රෝහණ සඳහන් කරනවා.
මාධ්‍ය හමුවේ අදහස් දක්වමින් සභාපතිවරයා අද (15) මේ බව සඳහන් කර සිටියා.
“මේ වන විට දිවයින පුරා ඩෙංගු රෝගය සීඝ්‍රයෙන් පැතිර යන බව දකින්න තිබෙනවා. ඩෙංගු රෝගය පාලනය කිරීම සදහා බලධාරීන් ගෙන ඇති ක්‍රියාමාර්ග සම්බන්ධයෙන් අපිට සෑහීමකට පත්වන්න පුළුවන් කමක් නෑ, මොකද නිසි පුහුණුවකින් තොර නිලධාරීන් සහ මහජනතාව යොදා ගෙන කාලය කා දැමීමෙන් මේ කටයුත්ත කරන්න පුළුවන්කමක් නොමැති බවයි කියන්න තියෙන්නේ. දිවයින පුරා සිටින සියළුම මහජන සෞඛ්‍ය පරීක්ෂකවරුන්ව ගම්පහ දිස්ත්‍රික්කයේ ඩෙංගු මර්ධන කටයුතු සදහා යොදවන්න අපිට හැකියාව තිබෙනවා. මෙහිදී විශේෂයෙන්ම කියන්න තියෙන්නේ අපි එම කටයුත්තට සහභාගි වෙන්නේ අමතර කිසිඳු දීමනාවක් බලාපොරොත්තුවෙන් නොව ජාතික වගකීමක් ලෙස සලකා බවයි. ඩෙංගු මදුරු කීටයින් සොයායන ඇතැම් සෞඛ්‍ය සේවකයින්ට මහජනතාව විසින් විවිධ බාධා කිරීම් සිදුකර ඇති බවත් පසුගිය දිනවල වාර්තා වී තිබුණා.මින් ඉදිරියට ඩෙංගු කීටයින් ඉන්නවා ද කියලා සොයා බලන්න එන්න පෙර අපි ඒ සම්බන්ධයෙන් පෙර දැණුවත් කිරීමක් කරන්නේ නෑ.ඒ නිසා පොදු නිවේදනයක් කොට සලකා සියළුම ජනතාව ඒ සදහා සහාය දෙන්න කියා ඉල්ලා සිටිනවා. කිසියම් ආකාරයකට සෞඛ්‍ය සේවකයින් ඩෙංගු කීටයින් සම්බන්ධයෙන් සොයා බැලීමට ගිය විට බාධා කිරීම් කළහොත් අපි ඔවුන්ට එරෙහිව නීතිමය පියවර ගන්නා බවද කියන්න කැමතියි.”
