කෙසෙල්වත්ත පොලිස් වසමේ ටෙක්නිකල් හංදිය ප්රදේශයේ දී අද (07) අලුයම තියුණු ආයුධයකින් පහරදීම හේතුවෙන් කාන්තාවක් ජීවිතක්ෂයට පත්ව තිබෙනවා.
තියුණු ආයුධ ප්රහාරයට ලක් වූ අදාළ කාන්තාව කොළඹ ජාතික රෝහලට ඇතුළත් කිරීමෙන් අනතුරුවයි ජීවිතක්ෂයට පත්ව ඇත්තේ.
ඝාතනයට ලක්වූ කාන්තාව 32 හැවිරිදි වියේ පසුවන අතර, ඇයගේ අස්ථිර පදිංචිය පිළිබඳව මෙතෙක් අනාවරණය වී නොමැති බවයි පොලිසිය පැවසුවේ.
මෙම කාන්තාව සහ තවත් පුද්ගලයෙක් සමඟ ඇති වූ පුද්ගලික ආරවුලක් මත මෙම ඝාතනය සිදුකර ඇති බවයි විමර්ශනවල දී අනාවරණය වී ඇත්තේ.
අපරාධය සිදුකළ පුද්ගලයා හඳුනාගෙන ඇති අතර, ඔහුව අත්අඩංගුවට ගැනීමට විමර්ශන ක්රියාත්මකයි.
මේ අතර කුච්චවේලි පොලිස් වසමේ කුඹුරුපිටිය ප්රදේශයේ දී දෙදෙනෙකු අතර ඇති වූ ගැටුමකින් පසු තුවාල ලබා රෝහල් ගතකර සිටි පුද්ගලයෙක් ඊයේ (06) මියගොස් තිබෙනවා.
මෙලෙස මියගොස් ඇත්තේ වයස අවුරුදු 30ක කුඹුරුපිටිය ප්රදේශයේ පදිංචි අයෙක්.
මෙම පුද්ගලයා සහ ඔහුගේ සහෝදරයා පසුගිය 05 වනදා දහවල් එකට මත්පැන් පානය කර ඇති අතර, එහිදී දෙදෙනා අතර ආරවුලක් ඇතිව තිබෙනවා.
එහිදී සහෝදරයා විසින් මොහුට පිහියකින් සහ උදැල්ලකින් පහර දී ඇති අතර, පහරකෑමෙන් බරපතල තුවාල ලැබූ පුද්ගලයා රෝහල් ගතකර සිටිය දී මෙලෙස මියගොස් ඇති බව සඳහන්.
අපරාධය සිදුකළ සැකකරු අත්අඩංගුවට ගැනීමට විමර්ශන ක්රියාත්මකයි.
