ඩුබායි වෙත පිටත්ව යාම සඳහා කටුනායක ගුවන් තොටුපොළ වෙත පැමිණි විශ්‍රාමික ගුවන් හමුදා සෙබළියකගේ අත් බෑගයෙහි තිබී ටී – 56 උණ්ඩයක්
සොයාගෙන තිබෙනවා.
ගමන් මළු පරිලෝකන යන්ත්‍ර (Scan Test ) පරීක්ෂා කිරීම සිදු කරමින් සිටිය දී ගුවන් තොටුපොළ ආරක්ෂක නිලධාරීන් විසින් එය සොයාගෙන ඇති බවයි වාර්තා වන්නේ.
පසුව එය වැඩි දුර විමර්ශන කටයුතු සඳහා අපරාධ පරීක්ෂණ දෙපාර්තමේන්තුවේ නිලධාරීන් වෙත භාර දී තිබෙනවා.
අදාල විශ්‍රාමික ගුවන් හමුදා සෙබළිය කුරුණෑගල – නිකදළුපොත, හිරිපිටිය ප්‍රදේශයේ පදිංචි 37 හැවිරිදි තැනැත්තියක්.
ඩුබායි ජීවත්වන සිය සහෝදරිය බැලීමට යාම සඳහා ඇය කටුනායක ගුවන් තොටුපොළ වෙත පැමිණ තිබූ බවයි වාර්තා වන්නේ.
එහිදී ඇය ප්‍රකාශයක් ලබා දෙමින් පවසා තිබෙන්නේ මෙම උණ්ඩය තම අත් බෑගය තුළට පැමිණි ආකාරය පිළිබඳව තමාට ද අවබෝධයක් නොමැති බවයි.
ඉන්පසුව එම කාන්තාව සහ ජීව උණ්ඩය වැඩිදුර විමර්ශන කටයුතු සඳහා කටුනායක ගුවන් තොටුපොළ පොලිසිය වෙත භාර දීමට පියවර ගෙන තිබෙනවා.
මෙම විශ්‍රාමික සෙබළිය අද (01) දින මීගමුව මහේස්ත්‍රාත් අධිකරණය වෙත ඉදිරිපත් කිරීමට නියමිතයි.
