යුක්‍රේන යුද්ධය උත්සන්න නොකරන ලෙස රුසියානු ජනාධිපති ව්ලැඩිමීර් පුටින්ගෙන් ඇමරිකානු නව ජනාධිපති ඩොනල්ඩ් ට්‍රම්ප් ඉල්ලා තිබෙනවා.
ඩොනල්ඩ් ට්‍රම්ප් ජනාධිපතිවරයා සහ රුසියානු ජනාධිපතිවරයා අතර පැවති දුරකථන සංවාදයක දී මෙම ඉල්ලීම සිදුකර ඇති බවයි විදෙස් මාධ්‍ය වාර්තා කළේ.
එක්සත් ජනපද ජනාධිපති ඩොනල්ඩ් ට්‍රම්ප් පසුගිය බ්‍රහස්පතින්දා ෆ්ලොරිඩාවේ ඔහුගේ මාර්-ඒ-ලාගෝ වතුයායේ සිට පුටින් වෙත මෙම ඇමතුම ලබාගෙන ඇති බවයි තොරතුරු වාර්තා වන්නේ.
යුක්‍රේන යුද්ධය ඉක්මනින් විසඳීම ගැන සාකච්ඡා කිරීම සඳහා තමන් උනන්දුවක් දක්වන බව ට්‍රම්ප් ජනාධිපතිවරයා මෙහිදී පවසා තිබෙනවා.
එක්සත් ජනපද ජනාධිපතිවරයා පුටින් ඇමතීමට පෙර පසුගිය බදාදා දිනයේ දී යුක්‍රේන ජනාධිපතිවරයා ද දුරකථනයෙන් අමතා ඇති බවයි විදෙස් මාධ්‍ය වාර්තා කර තිබුණේ
වසර දෙකහමාරකට වැඩි කාලයක සිට ඇවිළී ඇති රුසියානු-යුක්‍රේන ගැටුම ගෝලීය භූ දේශපාලනයේ ප්‍රධාන ගැටලුවක් ලෙස පත්ව අවසන්.
