පාර්ලිමේන්තුවේ අලුතින් පිහිටුවන ලද ජාතික සභාවේ පළමු රැස්වීම අද (29) පෙරවරු 10.30ට රැස්වීමට නියමිතව තිබෙනවා.
ඒ, කථානායක මහින්ද යාපා අබේවර්ධනගේ ප්‍රධානත්වයෙන්.
මෙහිදී ජාතික සභාවේ මූලික කරුණු පිළිබඳ සාකච්ඡා කිරීමට නියමිත බවයි වාර්තා වන්නේ.
කථානායකවරයා සභාපතීත්වය දරණ මෙම ජාතික සභාවට අග්‍රාමාත්‍යවරයා, සභා නායකවරයා, විපක්ෂ නායකවරයා, ආණ්ඩු පක්ෂයේ ප්‍රධාන සංවිධායක, විපක්ෂයේ ප්‍රධාන සංවිධායකවරයා සහ පාර්ලිමේන්තුවේ දේශපාලන පක්ෂ නියෝජනය කරන මන්ත්‍රීවරු ඇතුළු 35කට වැඩි සාමාජික සංඛ්‍යාවක් ඇතුළත් වනවා.
මේ අතර ශ්‍රී ලංකා නිදහස් පක්ෂය, ජාතික ජනබලවේගය, දෙමළ ජාතික සන්ධානය, උත්තර ලංකා සභාගාය නියෝජනය කරන පක්ෂ හා ඩලස් අලහප්පෙරුමගේ පාර්ශවය විසින් මෙම ජාතික සභාවට සාමාජිකයින් නම් නොකිරීමද විශේෂත්වයක්.
අද දිනයේ ආරම්භවන ජාතික සභාවට තමන් සහභාගී නොවන බව විපක්ෂ නායක සජිත් ප්‍රේමදාස සඳහන් කර තිබෙනවා.
ජන හමු කිහිපයකට සහභාගී වීමට නියමිතව ඇති බැවින් මේ සඳහා සහභාගී වීමට හැකියාවක් නොමැති බවයි විපක්ෂ නායකවරයා සඳහන් කළේ.
රටේ ආර්ථික හා දේශපාලනික ගැටලුවලට විසඳුම් සෙවීමේ අරමුණින් ජාතික සභාව පිහිටුවීමේ යෝජනාවට පසුගිය 20 වැනිදා පාර්ලිමේන්තුවේ අනුමැතිය හිමි වුණා.
