ශ්‍රී ලංකාව සහ ජාත්‍යන්තර ණයහිමියන් අතර බැඳුම්කර ප්‍රතිව්‍යුහගත කිරීම සඳහා වන කොන්දේසි සම්බන්ධයෙන් එකඟතාවයකට පැමිණ තිබෙනවා.
ඒ, අනුව ජාත්‍යන්තර බැඳුම්කරවල 28%ක නාමික අඩුකිරීමකට ණයහිමියන් එකඟ වී ඇති බව සඳහන්.
මෙම එකඟතාවය යටතේ ඇමරිකානු ඩොලර් බිලියන 12.5ක ජාත්‍යන්තර බැඳුම්කර ප්‍රතිව්‍යුහගත කිරීමට නියමිතයි.
ජාත්‍යන්තර මුල්‍ය අරමුදල විසින් ශ්‍රී ලංකාවට ලබා දී ඇති ප්‍රධාන කොන්දේසියක් වන්නේ ජාත්‍යන්තර බැඳුම්කර ප්‍රතිව්‍යුහගත කිරීමයි.
ජාත්‍යන්තර ණයහිමියන් සහ ශ්‍රී ලංකාව අතර වසරකට වැඩි කාලයක් පැවති සාකච්ඡාවලින් අනතුරුවයි මෙම එකඟතාවට පැමිණ ඇත්තේ.
ප්‍රතිව්‍යුහගත කිරීම අවසන් කිරීම සඳහා ගිවිසුමට එකඟ විය යුතු සියලුම බැඳුම්කර හිමියන්ට ශ්‍රී ලංකාව යෝජනාව ඉදිරිපත් කළ යුතු වනවා.
මේ අතර ඩොලර් බිලියන 10ක පමණ ද්විපාර්ශ්වික ණය ප්‍රතිව්‍යුහගත කිරීම සඳහා ජපානය, ඉන්දියාව සහ චීනය ඇතුළු ණය දෙන රටවල් සමඟ ශ්‍රී ලංකාව පසුගිය ජුනි මස අගදී ගිවිසුමක් අත්සන් කරනු ලැබුවා.
