ජනාධිපති අනුර කුමාර දිසානායක සහ ශ්රී ලාංකීය ගායක ගායිකා සංගමය අතර හමුවක් ජනාධිපති ලේකම් කාර්යාලයේදී අද (05) පස්වරුවේ පැවැත් වුණා.
ගීතයක පරම සහ නෛතික අයිතිවාසිකම පද රචකයාට, තනු නිර්මාපකයින්ට මෙන්ම ගායක ගායිකාවන්ට ද ලබාදීමට අවශ්ය නීති සංශෝධනය කරන ලෙස ශ්රී ලාංකීය ගායක ගායිකා සංගමය මෙහිදී ජනාධිපතිවරයාගෙන් ඉල්ලීමක් කළා.
බුද්ධිමය දේපළ පනත යටතේ ගීතයක පරම අයිතිය පද රචකයාට හා තනු නිර්මාපකයාට තිබෙන නිසා ජනප්රිය ගායක ගායිකාවන් රැසක් අර්බුදයකට පත්ව ඇති අතර, තමන්ගේ සමාජ මාධ්යක ගීතයක් පළ කිරීමට ද හැකියාවක් නැති බවද මෙහිදී අවධාරණය කෙරුණා.
මේ හේතුවෙන් වෘත්තීය වශයෙන් ගායන ක්ෂේත්රයේ නියුතු බොහෝ ගායක ගායිකාවන් අසාධාරණයට ලක්ව තිබෙනවා.
මේ සියලු කරුණු පිළිබඳව සලකා බලා ස්වාධීන කමිටුවක් පත් කර අවශ්ය නීතී සංශෝධනය කර දෙන ලෙස ගායක ගායිකා සංගමය විසින් ජනාධිපතිවරයාගෙන් ඉල්ලීමක් කළා.
මෙම ගැටලුව කාලාන්තරයක් තිස්සේ පැවතෙන බවත්, ඒ නිසා මේ පිළිබඳ අධ්යයනය කර දැනට පවතින ජාත්යන්තර නීතිය සහ තාක්ෂණික අවශ්යතා මත පදනම්ව ජාත්යන්තර වශයෙන් ගොඩනැඟී ඇති සම්මුති අධ්යයනය කරමින්ද, ඉහත සඳහන් සියලු පාර්ශ්ව ඉදිරිපත් කරන කරුණු සැලකිල්ලට ගනිමින්ද, සෑම පාර්ශ්වයකටම සාධාරණත්වය ඉෂ්ට වන පරිදි විසඳුමක් සඳහා ප්රවේශයක් ලබාගත යුතු බව ජනාධිපතිවරයා මෙහිදී පෙන්වා දුන්නා.
බුද්ධශාසන, ආගමික සහ සංස්කෘතික කටයුතු අමාත්ය ආචාර්ය හිනිදුම සුනිල් සෙනෙවි, ශ්රී ලාංකීය ගායක ගායිකා සංගමයේ සභාපති රොහාන් ද සිල්වා, සංගීත අනුමණ්ඩලයේ සභාපති නදීක ගුරුගේ, සුජාතා අත්තනායක, ටී.එම්.ජයරත්න, සුනිල් එදිරිසිංහ, මල්කාන්ති නන්දසිරි, ජගත් වික්රමසිංහ, ජානක වික්රමසිංහ, රෝහණ බෝගොඩ, සෝමසිරි මැදගෙදර, දීපිකා ප්රියදර්ශනී, රොඩ්නි වර්ණකුල ඇතුළු පිරිසක් මෙම අවස්ථාවට එක්ව සිටියා.
wpDiscuz
