තමා මෙතෙක් පැමිණි දේශපාලන ගමනේදී මෙරට සමස්ත මහා සංඝරත්නයේ ආශිර්වාදය නිරතුරුව තමාට හිමි වූ බවත්, රටේ සියලු ජනතාව වෙනුවෙන් ශක්තිමත් ආර්ථිකයක් ගොඩනැගීම සඳහා සියලුදෙනා එක් කර ගනිමින් ආරම්භ කර ඇති වැඩපිළිවෙළ සඳහා ද සමස්ත මහා සංඝරත්නයේ අවවාද අනුශාසනා අපේක්ෂා කරන බවත් ජනාධිපති රනිල් වික්රමසිංහ පවසනවා.
‘පුළුවන් ශ්රී ලංකා’ මාධ්ය අංශය විශේෂ නිවේදනයක් නිකුත් කරමින් සඳහන් කළේ; ජනාධිපතිවරයා ඊයේ (27) කුරුණෑගල දී පැවති සත්කෝරල මහා සංඝ සමුළුව අමතමින් මේ බව ප්රකාශ කළ බවයි.
ජනාධිපතිවරයා රට ජාතිය සහ සම්බුදු සසුන වෙනුවෙන් ඉටු කරන සුවිශාල මෙහෙවර අගයමින් මහා සංඝරත්නය මෙහිදී සෙත් පිරිත් දේශනා කර ජනාධිපතිවරයා වෙත අශිර්වාද පළ කළා.
රටේ දුක් විඳින ජනතාවගේ අයිතිවාසිකම් ලබාදීමට රජය ඉදිරියටත් කැපවන බවට මහා සංඝරත්නය ඉදිරියේ සහතික වූ ජනාධිපතිවරයා තමා මෙවර ජනාධිපතිවරණයට ඉදිරිපත් වූයේ රට ගොඩගැනීම සඳහා පසුගිය වසර දෙක තුළ ආරම්භ කළ වැඩපිළිවෙළ ඉදිරියට ගෙන යාම වෙනුවෙන් බව ද කියා සිටියා.
