රට තුළ කිසිදු අයුරකින් ත්‍රස්තවාදය වැළැක්වීමේ පනත ක්‍රියාත්මක කිරීමට තමන් කැමැත්තක් නොදක්වන බවත්, ජාතිවාදය වපුරුවාලීම වැළැක්වීම සඳහා පමණක් එම පනත සක්‍රීය කර ඇති බවත් ජනාධිපති අනුර කුමාර දිසානායක මහතා ප්‍රකාශ කර තිබෙනවා.
අද (04) පස්වරුවේ ජනාධිපතිවරයා සහ ඉලංගෙයි තමිල් අරසු කච්චි (ITAK) පාර්ලිමේන්තු මන්ත්‍රීවරුන් අතර සාකච්ඡාවක් පැවති අතර එය අවසන් වී පිටතට පැමිණීමෙන් අනතුරුව මාධ්‍ය වෙත අදහස් දක්වමින් මන්ත්‍රී ෂානක්කියන් රාජපුත්තිරන් රාසමාණික්කම් මේ බව ප්‍රකාශ කළා.
එමෙන්ම අද සාකච්ඡාවේ දී ද වැඩි වශයෙන් අවධානය යොමු වූයේ පසුගියදා ගංවතුරින් පීඩා විඳි ජනයා සම්බන්ධයෙන් බවත්, පෙර සිටි ජනාධිපතිවරුන් සමග කළ සාකච්ඡා මාතෘකාවන් ද මෙහිදී සාකච්ඡාවට ගැනුණු බවත් හෙතෙම කියා සිටියා.
රට තුළ බලය බෙදීම , අතුරුදන් වූ පුද්ගලයින්, ඉඩම් ගැටලුව සහ යුද හමුදා කඳවුරු පිළිබඳව ද මෙහිදී ජනාධිපතිවරයාගේ අවධානය යොමු කළ බවයි රාසමාණික්කම් මන්ත්‍රීවරයා පැවසුවේ.
මෙම හමුවට සිවඥානම් ශ්‍රීධරන්, පත්මනාදන් සත්‍යලිංගම්, සන්මුගම් කුගදාසන්, ෂානක්කියන් රාසමාණික්කම්, ඥානමුත්තු ශ්‍රීනේසන්, කවීන්දිරන් කෝඩීස්වරන්, ඉලයතම්බි ශ්‍රීනාත්, තුරෙයිරාසා රවිහරන් යන පාර්ලිමේන්තු මන්ත්‍රීවරු මෙම අවස්ථාවට සහභාගී වූ බවත් ජනාධිපති මාධ්‍ය අංශය නිවේදනය කළා.
