ජංගම දුරකථන තොගයක් නීති විරෝධීව ගෙන ආ දෙදෙනෙක් අත්අඩංගුවට (ඡායාරූප)

නීති විරෝධී ලෙස ජංගම දුරකථන තොගයක් ඩුබායි සිට මෙරටට ගෙන ආ ශ්‍රී ලාංකිකයින් දෙදෙනෙක් කටුනායක ගුවන් තොටුපොළේ දී අත්අඩංගුවට ගෙන තිබෙනවා.

ගුවන්තොටුපොළ අපරාධ පරීක්ෂණ දෙපාර්තමේන්තු නිලධාරීන් විසින් මෙම පුද්ගලයින් දෙදෙනාව අත්අඩංගුවට ගෙන ඇති බවයි වාර්තා වුණේ.

සැකකරුවන් දෙදෙනා විසින් ජංගම දුරකථන 1,083ක් සහ USB පෙන් ඩ්‍රයිව් 200ක් මෙලෙස තීරු බදු නොගෙවා නීති විරෝධී ලෙස රට තුළට රැගෙන යෑමට උත්සාහ කර තිබෙනවා.

මේවායේ වටිනාකම රුපියල් රුපියල් කෝටි පහක් බවයි වාර්තා වන්නේ.

සැකකරුවන් දෙදෙනාගෙන් එක් අයෙක් කොළඹ – 12 ප්‍රදේශයේ පදිංචි අයෙකු වන අතර, ඔහු 59 හැවිරිදි වියේ පසුවනවා.

අනෙක් සැකකරු කොළඹ – 14 පදිංචි 24 හැවිරිදි අයෙක්.

ඔවුන් දෙදෙනා අද (17) දින අලුයම 04.55 ට ඩුබායි සිට ශ්‍රී ලන්කන් ගුවන් සේවයේ යූ.එල්.- 226 දරණ ගුවන් යානයෙන් කටුනායක ගුවන් තොටුපොළ වෙත පැමිණ තිබුණා.