චීනයේ ෂින්යු නගරයේ වෙළෙඳසැලක පහළ මාලයේ ඇති වූ ගින්නකින් පුද්ගලයන් 39 දෙනකු මියගොස් තවත් 9 දෙනකු තුවාල ලබා තිබෙනවා.
චීනයේ රාජ්‍ය මාධ්‍ය පැවසුවේ ජියැන්ග්සි පළාතේ අද පස්වරුවේ මෙම ගින්න සිදුවී ඇති බවයි.
ජනාධිපති ෂී ජින්පින් මෙම ගින්න සම්බන්ධයෙන් පරීක්ෂණයක් පවත්වන ලෙස දැනුම්දී තිබෙනවා. රට තුළ සිදුවන මෙවැනි මාරාන්තික සිදුවීම් අධිෂ්ඨානශීලීව මැඩපැවැත්විය යුතු බවයි ඔහු ප්‍රකාශ කර ඇත්තේ.
අද මෙම ගින්න වාර්තා වන්නේ මධ්‍යම හෙනාන් පළාතේ පාසල් නේවාසිකාගාරයක ඇති වූ ගින්නකින් ළමුන් 13 දෙනෙකු මිය ගොස් දින කිහිපයකට පසුව වීම විශේෂත්වයක්. එම ගින්න සම්බන්ධයෙන් පාසලේ කාර්ය මණ්ඩලයේ හත් දෙනෙකු පසුව පොලිස් අත්අඩංගුවට ද පත් වුණා.
පසුගිය නොවැම්බර මාසයේ උතුරු චීනයේ Shanxi පළාතේ ගල් අඟුරු සමාගම් කාර්යාලයක ඇති වූ ගින්නකින් ද පුද්ගලයින් 26 දෙනෙකු මිය ගිය අතර විශාල පිරිසක් රෝහල් ගත කරනු ලැබුවා.
එමෙන්ම වයඹ දිග චීනයේ බාබකියු අවන්හලක සිදුවූ පිපිරීමකින් 31 දෙනෙකු මිය ගියා.
පසුගිය අප්‍රේල් මාසයේදී බීජිං හි රෝහල් ගින්නකින් පුද්ගලයන් 29 දෙනෙකු මිය ගිය අතර දිවි ගලවා ගත් අයට පැන යාමට ජනේලවලින් පැනීමට ද සිදුවුණා.
