ශ්‍රී ලංකාව ගුවන් තොටුපලවල ගොඩබිම් හැසිරවීම, ආහාර සැපයීම සහ ජෙට් ඉන්ධන සැපයීමේ මෙහෙයුම් සඳහා පුද්ගලික අංශයට ද ඉඩ ලබා දෙන බවට තොරතුරු වාර්තා වනවා.
ගුවන් තොටුපලවල ගොඩබිම් හැසිරවීම, ආහාර සැපයීම සහ ජෙට් ඉන්ධන සැපයීමේ මෙහෙයුම් සඳහා පුද්ගලික අංශයට ඇතුළු වීමට ඉඩ ලබා දීමට තීරණය කර ඇති බවට ෂින්හුවා පුවත් සේවය වාර්තා කර තිබෙනවා.
මෙම සේවාවන් දැනට රාජ්‍ය ඒකාධිකාරයක් බවට පත්ව ඇති බවට සිවිල් ගුවන් සේවා අධ්‍යක්ෂ ජනරාල් පී.ඒ ජයකාන්ත මහතා මාධ්‍ය වෙත අදහස් දක්වමින් ප්‍රකාශ කළ බවයි ෂින්හුවා පුවත් සේවය පෙන්වා දී ඇත්තේ.
ශ්‍රී ලංකාවේ ජාත්‍යන්තර ගුවන් තොටුපළවල ඉහත සඳහන් සේවා සැපයීම සඳහා පෞද්ගලික අංශයට ආරාධනා කිරීමට රජය කටයුතු කරමින් සිටින බව ඔහු ප්‍රකාශ කළ බව එම පුවත් සේවය වාර්තා කර තිබෙනවා.
මේ අතර පසුගියදා අමාත්‍ය නිමල් සිරිපාල ද සිල්වා කියා සිටියේ ශ්‍රී ලංකාව දැනටමත් ගුවන් තොටුපලවල ඉන්ධන සැපයීම ලිහිල් කිරීමේ ක්‍රියාවලියක ද නිරතව සිටින බවයි.
මේ අතර, ජාත්‍යන්තර මූල්‍ය අරමුදල සමඟ අත්සන් කර ඇති වැඩසටහනට අනුකූලව සීමාසහිත ශ්‍රී ලංකන් ගුවන් සමාගම ඇතුළු රාජ්‍ය ව්‍යවසායන් ප්‍රතිසංස්කරණය කිරීමට ශ්‍රී ලංකා රජය තීරණය කර ඇති බවට ද තොරතුරු වාර්තා වනවා.
මේ අතර ශ්‍රී ලන්කන් ගුවන් සේවයේ සියලුම ගුවන් නියමුවන් ඉවත්ව ගිය ද විදේශිය ගුවන් නියමුවන් බඳවා ගෙන හෝ ඉදිරියට පවත්වාගෙන යන බව අමාත්‍ය නිමල් සිරිපාල ද සිල්වා ප්‍රකාශ කර තිබෙනවා.
ශ්‍රී ලන්කන් ගුවන් සේවයේ ගුවන් ගුවන් නියමුවන් විශාල පිරිසක් විදේශගතව ඇති බවයි ඔහු සඳහන් කර ඇත්තේ.
අමාත්‍යවරයා මෙම අදහස් පළ කර ඇත්තේ සිවිල් ගුවන් සේවා අධිකාරියේ පැවති මාධ්‍ය හමුවකට සහභාගී වෙමින්.
ප්‍රතිව්‍යුහගත කිරීමේදී ගුවන් සමාගමේ පරිපාලන තීන්දු ගැනීමට අයෝජකයාට සම්පූර්ණ ඉඩකඩ ලබා දෙන බවද ඔහු එහිදී සඳහන් කර තිබෙනවා.
