වතුකරය තුළ පවතින මිනිස් ජාවාරම් නිසා වතුකරයේ 17 හැවිරිදි තවත් දැරියක් පසුගිය 19 වැනිදා අකාලයේ මියගොස් ඇතැයි ප්රොටෙක් සංවිධානයේ නුවරඑළිය දිස්ත්රික් නායිකා එම් . මෛත්රිලි හැටන්හිදී ඊයේ ( 24 දා ) පැවැති මාධ්ය හමුවකදී හෙළි කළාය . ගම්පහ ප්රදේශයේ නිවෙසක නාන තටාකය සුද්ධ පවිත්ර කිරීමට යෑමේදී මෙම 17 හැවිරිදි තරුණිය දියේ ගිලී මියගොස් ඇතැයිද ඇය කීවාය . දැරියගේ මාමාගේද අනුදැනුම ඇතිව මස්කෙළිය මෝකා වතුයායේ සිට ඇය ගම්පහ ප්රදේශයේ මෙම නිවෙසට ගෙන ගොස් ඇත්තේද මිනිස් ජාවාරම් කරන තැරැව්කරුවකු විසිනැයි ඇය කීවාය . ඉකුත් 19 වැනිදා මියගොස් ඇති ඇය පිළිබඳ වැඩිදුරටත් අදහස් දැක්වූ ඇය මෙසේද කීවාය . මෙම දැරිය ජීවත්ව තියෙන්නේ මාමා සමඟයි . මෙම දැරිය අධ්යාපනයද නතර කර ඇති දැරියක් බවයි දැන ගන්න තියෙන්නේ .
එසේ සිටින විට මෙම දැරිය ගම්පහ ප්රදේශයේ නිවෙසක මෙහෙකාර සේවයේ යෙදී සිටින විට එම නිවෙසේ නාන තටාකය සුද්ධ පවිත්ර කරන අවස්ථාවේදී දියේ ගිලී මියගොස් තිබෙනවා . මීට පෙර මෙසේම මියගිය ඉෂාලිගේ මරණය සිදුවන අවස්ථාවේදී සමහර බලධාරීන් පැවැසුවේ වතුකරයේ දරුවන් විවිධ ප්රදේශවල නිවාස තුළ මෙහෙකාර සේවය සඳහා රැගෙන යෑම පිළිබඳව දැඩි නීති ක්රියාත්මක කරන බවයි . ඒත් එම ප්රකාශ කතාවන්ට පමණක් සීමාවෙලා තියෙන්නේ මේ වතුකරයේ තරුණ ජීවිත විවිධ ප්රදේශවල මෙහෙකාර සේවය සඳහා යොමු කිරීම තුළින් සිදුවන්නේ වතුකරයේ තරුණ ජීවිත විශේෂයෙන් වතුකරයේ තරුණියන් අකාලයේ මියයෑමයි . වතුකරය තුළ සිදුකරන මෙම මිනිස් ජාවාරම් පිළිබඳව අදාළ බලධාරීන්ගේ දැඩි අවධානය යොමුවිය යුතුයි . එසේ නොවුණහොත් මේ වතුකරයේ තරුණ ජීවිත අකාලයේ විනාශ වීම තවත් වර්ධනය වෙන්න පුළුවන් .
