බස්නාහිර පළාතේ කොළඹ ඇතුළු ප්‍රදේශ කිහිපයක් ආශ්‍රිතව භූ කම්පන ඇතිවීමේ ප්‍රවණතාවක් දක්නට ලැබෙන බව පේරාදෙණිය විශ්ව විද්‍යාලයේ භූගර්භ විද්‍යා අංශයේ හිටපු ජ්‍යෙෂ්ඨ මහාචාර්ය අතුල සේනාරත්න පවසනවා.
ඒ, අනුව මේ සම්බන්ධයෙන් සැළකිලිමත්ව සිටිය යුතු බවයි මහාචාර්යවරයා සඳහන් කරන්නේ.
මහනුවර දී අද (03) පැවති මාධ්‍ය හමුවකට එක්වෙමින් ඔහු මේ බව සඳහන් කළා.
1615 වසරේ සිට මේ දක්වා බස්නාහිර පළාතේ කොළඹ ප්‍රදේශය ආශ්‍රිතව විශාල භූ කම්පන ප්‍රමාණයක් සිදුව ඇති බවයි ඔහු මෙම මාධ්‍ය හමුවේ දී සඳහන් කර සිටියේ.
මේ අතර බස්නාහිර පළාත ආශ්‍රිතව සුළු භූ කම්පන තත්ත්වයන් ඇති වෙන්නේ මුහුදේ ඇති අසාමාන්‍ය තත්ත්වය හේතුවෙන් බවට නිගමනය කළ හැකි බවයි මහාචාර්යවරයා සඳහන් කළේ.
ඉදිරියේදීත් බස්නාහිර පළාත ආශ්‍රිතව යම්කිසි භූ කම්පන ප්‍රමාණයක් ඇති විය හැකි බව සඳහන් කළ ඔහු ඉතා අධික ජනගහණයක් ඇති එම පළාතේ තරමක් හෝ ප්‍රබල භූ කම්පනයක් ඇති වුවහොත් විශාල විනාශයක් විය හැකි බවත් සඳහන් කර සිටියා.
ඒ, අනුව අදාළ ප්‍රදේශවල භූ කම්පන මාන හා අදාළ නවීන උපකරණ ස්ථාපිත කොට සුපරීක්ෂාකාරීව සිටීමට ක්‍රියාකළ යුතු බව මහාචාර්යවරයා වැඩිදුරටත් සඳහන් කළා.
එමෙන්ම අදාළ දත්ත රැස් කිරීම අනිවාර්යෙන්ම කළ යුතු බවත් ඔහු මෙහිදී අවධාරණය කර සිටියා.
“භූ විද්‍යාත්මක ඉතිහාසය අනුව අවුරුදු මිලියන 200 කට පමණ ඉහතදී ශ්‍රී ලංකාව, අප්‍රිකාව, මැඩගස්කරය, ඇන්ටාක්ටිකාව, ඉන්දියාව, ඕස්ට්‍රේලියාව එකම භූමියක් ලෙසින් තමයි පිහිටා තිබී තිබෙන්නේ. වසර ගණනාවක් තිස්සේ සංක්‍රමණය වෙලා තමයි ලංකාව දැන් මේ තියන ආකාරයෙන් ස්ථාපිත වෙන්නේ. අවසානයට ලංකාව හා ඉන්දියාව එකට හා වුණු ගොඩබිමක් වශයෙන් පැවතිලා තිබෙනවා. ඉන් කාලෙකට පස්සේ තමයි ලංකාවයි ඉන්දියාවයි වෙන් වෙන්නේ. මේ වෙන් වීම් සමඟ ලංකාව හා ඉන්දියානු මුහුදු අභ්‍යන්තරයේ අසාමාන්‍ය ලක්ෂණ රැසක් දක්නට ලැබෙනවා. මේ අභ්‍යන්තර මුහුදු භූමි තලයේ අසාමාන්‍ය ලක්ෂණ සහිත රේඛාව විශේෂයෙන් බස්නාහිර පළාත හරහා කොළඹ දක්වා ගමන් කරන ආකාරය පැහැදිලිව දැකගන්න පුළුවන්.”
