කොළඹ ඇතුළු දිවයිනේ විවිධ ප්රදේශවලින් ලබාගෙන ජාන විශ්ලේෂණ පරීක්ෂණවලට ලක් කෙරුණු කොරෝනා ආසාදිතයන්ගේ සාම්පල 88 කින් 84 කම ඩෙල්ටා සැර කොරෝනා වයිරස ප්රභේදය තිබී හමුවූ බවට ශ්රී ජයවර්ධනපුර විශ්ව විද්යාලයේ වෛද්ය පීඨයේ ආසාත්මිකතා, ප්රතිශක්තිවේද සහ සෛල ජෛව විද්යා අධ්යනාංශයේ ප්රධානී ආචාර්ය චන්දිම ජීවන්දර මහතා කළ ප්රකාශය සම්බන්ධයෙන් අද (21) පුවත්පත් වැඩිදුර තොරතුරු වාර්තා කර තිබෙනවා.
මේ අනුව මෙරටින් මේ දක්වා සොයාගෙන ඇති ඩෙල්ටා සැර කොරෝනා වයිරස ප්රභේදය ආසාදනයවූ පුද්ගලයන් සංඛ්යාව 201ක් දක්වා ඉහළ යනු ඇති.
ඩෙල්ටා සැර කොරෝනා වයිරස ප්රභේදය හමුවූ සාම්පලවලින් වැඩි ප්රමාණයක් කොළඹ ප්රදේශයෙන් ලබා ගත් ඒවා බව පැවසූ ආචාර්යවරයා ඩෙල්ටා හමුවූ සෙසු සාම්පල මහනුවර මාතලේ, රත්නපුර, නුවරඑළිය, ගාල්ල, වව්නියාව, මහරගම, මාලඹේ, ගම්පහ යන ප්රදේශවලින් ලැබී තිබුණු ඒවා බවද සඳහන් කළා.
ලංකාවේ පැතිර යන ඩෙල්ටා සැර කොරෝනා වයිරස ප්රභේදයේ විකෘති අවස්ථා තුනක් පසුගියදා සොයා ගත් බවත් එකම සෛලයක විකෘති අවස්ථා තුනක් එකවර හඳුනා ගැනුණු ලෝකයේ පළමු අවස්ථාව මෙය බවත් චන්දිම ජීවන්දර මහතා ප්රකාශ කර සිටියා.
මෙම විකෘති අවස්ථා තුනෙන් ඒ 7015 විකෘතිය මෙතෙක් හමුවී ඇත්තේ ශ්රී ලංකාවෙන් පමණක් බවද ඔහු සඳහන් කළා.
ඩෙල්ටා වයිරස සෛලයේ 1078S විකෘතිය මෙතෙක් හමුවී ඇත්තේ මැලේසියාවෙන් සහ ශ්රී ලංකාවෙන් පමණක් බව පැවසූ හෙතෙම 222V විකෘතිය ඩෙල්ටා පැතිරීම වේගවත්වීමට ප්රධාන වශයෙන් හේතු වන්නට ඇතැයි විශ්වාස කරන බවද ප්රකාශ කර තිබෙනවා.
මෙම විකෘතිතා සහිත ඩෙල්ටා ප්රභේදය හමුවී ඇත්තේ කොළඹ ප්රදේශයෙන් බවත් ඉදිරියේදී මෙම විකෘති නව ප්රභේදයක් ලෙස වර්ධනය වීමට ඉඩකඩ ඇති බවත් ඔහු සඳහන් කර සිටියා.
