අද (07) දිනය තුළ කොළඹ දිස්ත්‍රික්කයට බිත්තර ලක්ෂ 10ක ප්‍රමාණයක් රුපියල් 55.00ක මුදලකට අලෙවි කිරීම සඳහා බෙදාදීමට කටයුතු කරන බව බිත්තර නිෂ්පාදකයින්ගේ සංගමයේ සභාපති ආර්.එම්. සරත් රත්නායක සඳහන් කරනවා.
මාධ්‍ය හමුවක් කැඳවමින් ඊයේ (06) ඔහු මේ බව සඳහන් කළ අතර, ඒ අනුව කොළඹ දිස්ත්‍රික්කයේ ඇති ආර්ථික මධ්‍යස්ථාන සඳහා රුපියල් 53.00 බැඟින් වූ මුදලකට බිත්තර නිකුත් කරන බවයි ඔහු සඳහන් කළේ.
මේ අතර, ළමා රෝහලේ ආහාර ටෙන්ඩර් ලබාගෙන ඇති පුද්ගලයින්ට බිත්තරයක් රුපියල් 40.00ක වැනි මුදලකට ලබාදීමට පොරොන්දු වූ බවත් සභාපතිවරයා මෙහිදී සඳහන් කර සිටියා.
ඊට අමතරව ළමා රෝහල සඳහා අවශ්‍ය බිත්තර, දින 10ක් යනතුරු නොමිලේ සැපයීමට ද තීරණය කල බවයි බිත්තර නිෂ්පාදකයින්ගේ සංගමයේ සභාපති ආර්.එම්. සරත් රත්නායක මෙම මාධ්‍ය හමුවේ දී ප්‍රකාශ කළේ.
මේ අතර බිත්තර ආනයනය කිරීම සඳහා ටෙන්ඩර් කැඳවීම ලබන සඳුදා (09) දිනයේ ආරම්භ කරන බව රාජ්‍ය වාණිජ විවිධ නීතිගත සංස්ථාව සඳහන් කරනවා.
ඒ, අනුව බිත්තර ආනයනය සඳහා වන ටෙන්ඩර් කැඳවීම, ආනයනය කරනු ලබන බිත්තර සංඛ්‍යාව තීරණය කිරීම සහ සුදුසු ආනයනකරුවන් තෝරා ගැනීමේ කටයුතු ලබන සතිය තුළ දී සිදුකර අවසන් කිරීමට නියමිත බවයි වාර්තා වුණේ.
වෙළෙඳපොළට අවශ්‍ය වන බිත්තර ප්‍රමාණය රජය විසින් තීරණය කර රාජ්‍ය වාණිජ විවිධ නීතිගත සංස්ථාව වෙත දැනුම්දීමට නියමිතව තිබෙනවා.
